सिमलढाप, ६ साउन । चितवनको इच्छाकामना गाउँपालिकामा भूमिहिन दलित, सुकुम्बासी र अव्यवस्थित बसोबासीहरुका लागि जग्गा नाप नक्साङ्कन कार्य सुरु भएको छ । गाउँपालिकाको वडा नं. ७ स्थित भालुमारामा आज एक कार्यक्रमको आयोजना गरि जग्गाको नाप नक्साङ्कन कार्य सुरु गरिएको हो।

गाउँपालिका अध्यक्ष दान बहादुर गुरुङको अध्यक्षतामा आयोजना गरिएको शुभारम्भ कार्यक्रममा संघिय सांसद कृष्णभक्त पोखरेलको प्रमुख अतिथ्यता तथा जिल्ला समन्वय समिति चितवनका प्रमुख नारायणप्रसाद अधिकारी र राष्ट्रिय भूमि आयोग चितवनका अध्यक्ष बद्री तिमिल्सिनाको विशिष्ट आतिथ्यता रहेको थियो।

राष्ट्रिय भूमि आयोग संगको समन्वय र सहकार्यमा भूमिहिन दलित, भूमिहिन सुकुम्बासी र अव्यवस्थित बसोबासीहरुका लागि जग्गा नाप नक्साङ्कन शुभारम्भ कार्यक्रममा गाउँपालिका उपाध्यक्ष माया सिलवाल, वडाध्यक्षहरु, कार्यपालिका सदस्यहरु, राजनितिक दलका प्रतिनिधि, नापी कार्यालयका प्रतिनिधि, आयोगका विज्ञ सदस्य, गाउँपालिकाका भूमि सम्बन्धी सेवा केन्द्रका संयोजक हरि देवकोटा अमिन, सर्वेक्षक लगायतको उपस्थिति रहेका थिए ।

इच्छाकामना गाउँपालिकामा ३ हजार ५३९ जना भूमिहिन दलित, भूमिहिन सुकुम्बासी र अव्यवस्थित बसोबासीहरुहरुले निवेदन दिएको गाउँपालिका अध्यक्ष दान बहादुर गुरुङले जानकारी दिएका छन् । जसमध्य ८३ जना भूमिहिन दलित, ७७१ जना भूमिहिन सुकुम्वासी र २६८५ जना अव्यवस्थित बसोबासीहरु रहेको उनले बताए।

यस्तै उनीहरुलाई गाउँपालिकाले निस्सा वितरण गरिरहेको जानकारी दिदै कुनै प्रकारको विवाद, वाधा अट्चन, नआएमा सबै पक्ष र जिल्ला भूमी आयोगसँगको सहकार्यमा आगामी ३ महिना भित्र नाप नक्साङ्कन कार्य सकि ६ महिना देखि वर्ष दिन भित्र सबै प्रक्रिया पूरा गरि लालपूर्जा समेत वितरण गर्ने अध्यक्ष गुरुङले बताए।