अविनाश आचार्य, काठमाडौं, ३२ असार । प्रदेश सरकारहरूले पछिल्लो तीन वर्षमा औषतमा ५६ प्रतिशत मात्रै बजेट खर्च गरेका छन् । चालु आर्थिक बर्षको बजेट खर्चको अवस्था पनि उत्साहजनक देखिएको छैन । आर्थिक वर्ष सकिँदा कर्णाली प्रदेशले कुल बजेटको ६० प्रतिशत हाराहारीमा मात्र खर्च गरेको छ ।

चालु आर्थिक वर्षका लागि ३८ अर्ब ४७ करोड रूपैयाँ बजेट कार्यान्वयन गरेको कर्णालीले २२ अर्ब मात्रै खर्च ग¥यो । पुँजीगत तर्फ २४ अर्ब रूपैयाँ छुट्याएकोमा ३४ करोड १६ लाख मात्रै खर्च भएको छ । ३४ अर्ब २१ करोड रूपैयाँको बजेट कार्यान्वयनका क्रममा मधेस प्रदेशको खर्च ६४ प्रतिशतमात्रै देखिएको मधेस प्रदेश अर्थ मन्त्रालयका प्रवक्ताउद्धवराज न्यौपानेले बताउनुभयो ।

गण्डकी प्रदेश सरकारले चालु वर्षका लागि ३० अर्ब ९० करोड रूपैयाँको बजेट ल्याएकोमा त्यसको ७३ दशमलव ५ प्रतिशत खर्च गरेकोछ । पुँजिगत तर्फ १७ अर्ब ६५ करोड रूपैयाँ बराबरको लक्ष्य राखेकोमा ८६ प्रतिशत खर्च भएको प्रदेश अर्थ मन्त्रालयका प्रवक्ता बसन्त तिवारीले बताउनुभयो ।

बागमती प्रदेशका आर्थिक मामिला मन्त्री शालिकराम जमकटेलका अनुसार कोरोना महामारी र निर्वाचन लगायत कारणले यस वर्ष प्रदेशको ६९ प्रतिशत मात्रै बजेट खर्च भएको छ । प्रदेश १ मा चालु आर्थिक वर्षका लागि ३४ अर्ब ५४ करोड रूपैयाँ बराबरको बजेट बिनियोजन भएको थियो जसको ८७ प्रतिशत खर्च भएको छ ।

पुँजिगततर्फ भने ९० प्रतिशत बजेट खर्च छ । ४० अर्ब ९५ करोड रूपैयाँ बराबरको बजेट घोषणा गरेको लुम्बिनी प्रदेशले ७४ दशमलव ५८ प्रतिशत खर्च गर्न सक्यो । पूँजीगत तर्फ २२ अर्ब ४७ करोड रूपैँया विनियोजन गरेकोमा ७७दशमलव ४७ प्रतिशत खर्च भएको छ ।

आर्थिक मामिला तथा सुदुरपश्चिम प्रदेशका उपसचिव तुलसी भट्टराईका अनुसार आर्थिक वर्ष सकिँदा कुल बजेट खर्च ६६ दशमलव ७६ प्रतिशत मात्रै छ ।