जनार्दन शर्मामाथि छानबिन गर्न बनेको विशेष संसदीय समितिको पहिलो बैठक आउँदो मंगलबार बस्ने

इच्छाकामना न्युज

२४, आषाढ २०७९

जनार्दन शर्मामाथि छानबिन गर्न बनेको विशेष संसदीय समितिको पहिलो बैठक आउँदो मंगलबार बस्ने

काठमाण्डौ, २४ असार । बजेट निर्माणमा अनधिकृत मानिसलाई बोलाएर करका दर हेरफेर गरेको आरोप लागेका तत्कालीन अर्थमन्त्री जनार्दन शर्मामाथि छानबिन गर्न बनेको विशेष संसदीय समितिको पहिलो बैठक आउँदो मंगलबार बस्ने भएको छ । संसद सचिवालयका अनुसार आज सभामुख अग्निप्रसाद सापकोटाको सहजीकरणमा समितिमा रहेका सदस्यहरूबीच बैठक भएको थियो ।

बैठकमा सभामुख सापकोटाले समितिको सचिव सुरेन्द्र अर्याललाई बनाउने निर्णयबारे जानकारी गराउनुभएको थियो । शर्मामाथि छानबिन गर्न अस्ति बुधबार बसेको प्रतिनिधिसभा बैठकले ११ सदस्यीय समिति बनाएको थियो ।

समितिमा एमालेबाट खगराज अधिकारी, प्रदीप ज्ञवाली, भानुभक्त ढकाल र विमला विक सदस्य रहेका छन् । नेपाली काँग्रेसबाट पुष्पा भुसाल गौतम र सीताराम महतो, नेकपा माओवादी केन्द्रबाट देवप्रसाद गुरूङ र शक्तिबहादुर बस्नेत रहेका छन् ।

यस्तै, नेकपा एकीकृत समाजवादीको तर्फबाट सरलाकुमारी यादव, जसपाका सुरेन्द्र यादव र लोसपाबाट लक्ष्मणलाल कर्ण छानबिन समितिमा रहेका छन् । समितिलाई काम सुरु गरेको दश दिन भित्र काम सम्पन्न गर्ने कार्यादेश रहेको छ । छानबिन समिति बनेकै दिन संसदमा सम्बोधन गर्दै शर्माले अर्थमन्त्रीबाट राजीनामा दिनुभएको थियो ।