.png)
भरतपुर, २१ असार । वागमती प्रदेश सभा सदस्य रीना गुरूङले देशलाई निर्यातमुखी बनाउनुपर्ने बताएकी छन् । त्यसको लागि सरकारले कृषि उत्पादनमा ध्यान दिनुपर्ने भन्दै मंगलबार सामाजिक सञ्जाल फेसबुकमार्फत सरकारलाई झक्झक्याएकी हुन् ।
‘देश आयातमुखी होइन, निर्यातमुखी हुन जरूरी छ,’ कुनै दिन नेपाल पनि श्रीलङ्काकै अवस्थामा पुग्ने संकेत गर्दै उनले लेखेकी छन्, ‘कृषि उत्पादनमा विशेष ध्यान दिनुपर्ने हो । तर, सरकार राजनीतिक समीकरण बनाउनमै व्यस्त छ ।’
वर्तमान सरकारबाट जनताको चाहनाअनुसारको काम हुन नसक्दे आशय व्यक्त गर्दै राष्ट्रिय प्रजातन्त्र पार्टी (राप्रपा)की सहमहममन्त्रीसमेत रहेकी सांसद गुरूङले भनेकी छन्, ‘कुनै नीति आउला भनी आशा नगरौँ र सबै नागरिक नेपाली खाद्यवस्तुदेखि अधिकतम नेपाली उत्पादन नै उपभोग गर्नतर्फ लागौँ ।’ सवारीसाधन समेत आवश्यकताको आधारमा मात्र उपयोग गर्न पनि उनले सुझाव दिएकी छन् ।
महंगीको मारमा नेपाली नागरिक बाँचिरहनुपरेकोले नेपाल पनि कुनै दिन श्रीलङ्काजस्तै चरम आर्थिक संकटमा पर्नसक्ने समेत उनले संकेत गरेकी छन् । त्यसबाट जोगिन सरकारबाट सम्भव नदेखिएकोले जनता नै सचेत बन्नुपर्ने बेला आएको उनको भनाइ छ ।
