भुम्लिचोक, ११ चैत । गोरखाको गण्डकी गाउँपालिकामा सार्वजनीक सुनुवाई कार्यक्रम भएको छ । सार्वजनीक सुनुवाईमा स्थानीयले बिकास निर्माणको अनुगमन प्रभावकारी हुनुपर्ने, लक्षित बर्गको बजेटबारे राम्रो सँग जानकारी दिनुपर्ने, अनुदान बितरण समानुपातीक हुनुपर्ने जस्ता विषयमा प्रश्न उठाएका थिए ।
वडा नम्बर ५ का भरतकुमार श्रेष्ठले कृषि र पशु शाखाका कर्मचारी सहज उपलब्ध हुनुपर्ने, एउटै योजनाको पनि हरेक वर्ष भिन्दाभिन्दै खाता खोल्नुपर्दा समस्या भएको, सडक बिस्तारको नाममा बन बिनास भएको गुनासो गरे । साथै उनले बूढीगण्डकी डुबान पिडितको पक्षमा जनप्रतिनिधिले आयोजना कार्यालयलाई दबाव दिनुपर्ने, कार्यालयमा कर्मचारी नभेटिने गरेको गुनासो गरे ।
स्थानीय शसी सुनारले सडक बिस्तारको काम सुरु हुँदै रोकिँदै गरेको बताए । शिक्षक प्रकाश रेग्मीले शिक्षा क्षेत्रमा बजेट बिनियोजन कम भएको बताउँदै शिक्षलाई गाउँपालिकाले प्राथमिकतामा नराखेको गुनासो गरे । कार्यक्रममा महिलाहरुले सिप बिकासको बजेट, योजना र कार्यक्रमका बारेमा पनि जानकारी मागेका थिए ।
सहभागीले गरेको प्रश्नको जवाफ दिँदै गाउँपालिका अध्यक्ष होमबहादुर रानाले गाउँपालिकाको सिमित साधन र स्रोतका बिच धेरै काम गर्नुपर्दा सबै आवश्यकता पुरा हुन नसकेको बताए । साथै उनले गाउँपालिकाबासीले दिएको सुझाब र गुनासोलाई सम्पतीको रुपमा लिने र आगामी दिनमा त्यस्ता गुनासो आउन नदिने प्रतिवद्धता जनाए । कर्मचारी र जनप्रतिनिधिलाई पनि उनले गुनासो नआउने गरी काम गर्न अनुरोध गरे ।
उपाध्यक्ष ललिता अधिकारीले महिलाका लागि हरेक वर्ष बजेट प्राथमिकताका साथ बिनियोजन गरेको बताउँदै सिप बिकासका कार्यक्रम निरन्तर चलिरहेको बताईन । साथै उनले कुनै समुह वा समुदायमा लक्षित बर्गको कार्यक्रम माग भएमा संचालन गर्न पनि सकिने बताईन ।
गाउँपालिकाका प्रमुख प्रशासकिय अधिकृत बेदहरि अधिकारीले आर्थिक वर्ष २०७७÷७८ को बजेटको सांरास, प्रगती बिवरण र चालु वर्षको कार्यक्रमको बारेमा जानकारी गराएका थिए ।
गण्डकी प्रदेश प्रशिक्षण प्रतिष्ठान पोखराको सहयोग, गण्डकी गाउँपालिकाको आयोजनामा भएको कार्यक्रममको सहजिकरण नागरिक समाज सञ्चार नेटवर्क गोरखाले गरेको थियो । दरौदीं दैनिकबाट
