यसपटकको स्थानीय तहको निर्वाचनमा युवा जनप्रतिनिधि बढ्न सक्ने

सिआईएन

३, चैत्र २०७८

उषा तामाङ, काठमाडौँ, ३ चैत । यसपटकको स्थानीय तहको निर्वाचनमा युवा जनप्रतिनिधि बढ्न सक्ने अनुमान गरिएको छ । स्थानीय तहको निर्वाचन नजिकिदै गर्दा दलहरू तीव्र तयारीमा लागिरहेका बेला कतिपय युवा उम्मेद्वारी घोषणा गरेर प्रचारप्रसारमा लागिसकेका छन् भने, कतिपय उमेद्वार बन्ने मनसाय बनाईरहेका छन् ।

नेपालका प्रमुख राजनीतिक दलको नेतृत्व पङ्क्तीमा युवा सहभागीता बढ्दै गएका कारण पनि यसपटकको स्थानीय तहको चुनावमा धेरै युवा आकाङ्क्षीको रुपमा छन् । २०७४ मा सम्पन्न सङ्घ, प्रदेश र स्थानीय तहको चुनावमा २१ देखि ४० वर्षभित्रका १४ हजार जनप्रतिनिधि निर्वाचित भएका थिए ।

नेपालको कानूनले १६ देखि ४० वर्ष उमेर समूहका व्यक्तिलाई युवा मानेको छ । अघिल्लो निर्वाचनबाट स्थानीय तहमा ४० वर्ष मुनिका १३ हजार ८ सय ९३ युवा विभिन्न पदमा निर्वाचित भएका थिए । जसमा ५२ जना मेयर, १ सय ११ उपमेयर, १ सय १२ अध्यक्ष र २ सय ३७ जना उपाध्यक्ष थिए । भने देशभरका ६ हजार ७ सय ४२ वडाध्यक्षमध्ये ४० वर्ष मुनीका २ हजार ३६ जना छन्् । यो सङ्ख्या यसवर्ष बढ्ने समाजशास्त्रका उपप्राध्यापक दिपेश घिमीरेले बताउनुभयो ।

निर्वाचन आयोगका अनुसार यसपटकको स्थानीय तहको चुनावमा करिव १ करोड ७७ लाखले मतदान गर्नेछन् जसमा १८ देखि ४० वर्ष उमेरसमूहका मतदाता करिव ८७ लाख ७० हजार छन् ।