काठमाडौं । नेपालको राजनीतिक इतिहासमा स्थापित दललाई चुनौती दिँदै मूलधारको राजनीतिमा उदाएको राष्ट्रिय स्वतन्त्र पार्टी (रास्वपा) चार वर्षअघि मात्रै स्थापना भएको हो।

२०७९ असार ७ गते गठन भएको पार्टी २०७९ असार १७ गते निर्वाचन आयोगमा दर्ता भएको थियो। स्थापना भएको केही महिनामै भएको २०७९ सालको प्रतिनिधिसभा निर्वाचनमा रास्वपाले प्रत्यक्षतर्फ ७ सिट जित्दै समानुपातिकसहित २१ सिटका साथ संसद्मा उल्लेखनीय उपस्थिति जनाएको थियो।

चार वर्षको छोटो अवधिमै भने रास्वपाले नेपाली राजनीतिमा असाधारण उछाल मारेको छ। पछिल्लो निर्वाचनमा आइतबार रातिसम्म प्रत्यक्षतर्फका १६५ सिटमध्ये १२२ सिट जित्दै पार्टी सबैभन्दा ठुलो दल बनेको छ।

केही क्षेत्रमा अग्रता कायम रहेकाले अन्तिम परिणाम आउँदा संख्या अझ बढ्ने देखिएको छ। समानुपातिक मतमा पनि अग्रता कायम गरेकाले संसद्मा दुईतिहाइ नजिक पुग्ने अनुमान गरिएको छ।

रास्वपाको उभारको केन्द्रमा पार्टी सभापति रवि लामिछाने र वरिष्ठ नेता बालेन्द्र शाहको जुगलबन्दी देखिन्छ। पत्रकारिताबाट राजनीतिमा आएका लामिछानेले भ्रष्टाचारविरुद्धको अभियानलाई मुख्य एजेन्डा बनाए। उता, काठमाडौंका निवर्तमान मेयर बालेन्द्र शाह पार्टीमा आएपछि रास्वपाको लोकप्रियता झनै बढ्यो।

निर्वाचन अभियानमा “अबकी बार बालेन सरकार” भन्ने नाराले व्यापक चर्चा पायो। बालेन्द्रले केपी शर्मा ओलीलाई उनकै गृह जिल्लामा ठूलो मतान्तरले हराएपछि पार्टीको प्रभाव झनै बढेको बताइन्छ।

यसपटक रास्वपाले गगन थापा, नारायणकाजी श्रेष्ठ, प्रदीप पौडेल, उपेन्द्र यादव, राजेन्द्र महतो, महेंद्र राय यादव, सिके राउत लगायत स्थापित नेताहरूलाई पराजित गरेको बताइएको छ।

मतगणना अझै जारी छ। हालसम्म प्रत्यक्षतर्फ १५९ क्षेत्रको परिणाम आइसकेको छ। रास्वपाले १२२ सिट जित्दा  नेपाली कांग्रेसले १७, नेकपा एमालेले ८ र नेपाली कम्युनिस्ट पार्टीले ७ सिट जितेका छन्। अन्य साना दल र स्वतन्त्र उम्मेदवारले पनि केही स्थानमा सफलता पाएका छन्।

समानुपातिक मतगणनामा पनि रास्वपा अगाडि छ। त्यसपछि क्रमशः कांग्रेस, एमाले, नेकपा र राप्रपा रहेका छन्। अन्तिम नतिजा आएपछि संसद्मा शक्ति सन्तुलन कस्तो बन्ने भन्ने स्पष्ट हुनेछ।