आँबुखैरेनी । तनहुँ क्षेत्र नं. १ का नेपाली कांग्रेसका उम्मेदवार गोविन्द भट्टराईले बुद्धसिंह मार्गको 'लाइफलाइन' मानिने घुमाउने पुलसहित यस सडकखण्डमा पर्ने अन्य पाँचवटा पुलको निर्माण कार्यलाई पूर्णता दिनु आफ्नो मुख्य चुनावी एजेन्डा भएको बताउनुभएको छ। १२ वर्षदेखि अलपत्र परेको घुमाउने पुल र अन्य खोलामा पुल नहुँदा यस क्षेत्रका बासिन्दाले विकासको अनुभूति गर्न नपाएको भन्दै उहाँले यस्तो प्रतिबद्धता व्यक्त गर्नुभएको हो।
उम्मेदवार भट्टराईले संचारकर्मीसँगको कुराकानीमा भने, “घुमाउने पुल मात्र होइन, बुद्धसिंह मार्गमा पर्ने सुँढेखोला, ढाँडखोला, खानी खोला, बगर खोला र भूतखोला गरी सबै पाँचवटै पुलको निर्माण कार्यलाई गति दिनु मेरो पहिलो प्राथमिकता हुनेछ। यी पुलहरूको निर्माणमा भएको ढिलासुस्ती अन्त्य गरी जनतालाई सहज आवागमनको ग्यारेन्टी म गर्नेछु।”
उहाँले आफू निर्वाचित भएपछि अलपत्र परेका यी योजनाहरूलाई अगाडि बढाउन सम्बन्धित मन्त्रालय र सडक विभागमा तत्काल पहल गर्ने र बजेट सुनिश्चित गराउने बताउनुभयो। “यो मार्गले नारायणगढसँगको दूरी २३ किलोमिटर छोट्याउने भएकाले यसको महत्त्व ठुलो छ। विगतमा यस क्षेत्रको नेतृत्व गर्नेहरूले चासो नदिँदा पुलहरू अलपत्र परेका हुन्,” उहाँले थप्नुभयो, “आफ्नो चुनावी वाचा पत्रमा समेत मैले यी पुलहरूलाई समेटेको छु, मेरो जित नै यी पुल निर्माणको सुनिश्चितता हो।”
वि.सं. २०७० सालदेखि सुरु भएको घुमाउने पुल पटक–पटकको डिजाइन परिवर्तन र निर्माण कम्पनीको ढिलासुस्तीका कारण अहिलेसम्म ३६ प्रतिशत मात्र सम्पन्न भएको छ। पुल नहुँदा यातायातका साधनहरू तनहुँकै सिमानामा पुगेर फर्कनुपर्ने बाध्यता छ। उम्मेदवार भट्टराईले बुद्धसिंह मार्गलाई वैकल्पिक राजमार्गको रूपमा पूर्णता दिँदै यस क्षेत्रको आर्थिक समृद्धि ल्याउन पुल निर्माणको कामलाई कुनै पनि बहानामा रोकिन नदिने अठोट व्यक्त गर्नुभएको छ।
.png)
