इच्छाकामना ।  पर्यटन प्रवद्र्धनका लागि चितवनको इच्छाकामना–५मा अवस्थित प्रसिद्ध धार्मिक स्थल इच्छाकामना मन्दिर परिसरमा दुई दिन मेला लाग्ने भएको छ । आज र भोली मेला लाग्ने भएको हो ।

मेलाको अवसरमा पर्यटन प्रवद्र्धनका लागि विविध सांस्कृतिक कार्यक्रम हुने मन्दिर संरक्षण समितिका अध्यक्ष रामप्रसाद बोहोराले जानकारी दिनुभयो ।मेलामा राष्ट्रिय तथा स्थानीय विभिन्न विद्याका कलाकारहरुको प्रस्तुति पनि रहने उहाँले जानकारी दिनुभयो ।

इच्छाकामना मन्दिरमा हरेक वर्ष ठूलो पञ्चमीको अवसरमा रातभर मेला लाग्ने र बिहान पूजाआजाका साथै बली चढाइने परम्परा रहेको छ । केही वर्षदेखि इच्छाकामना गाउँपालिकाले मेलालाई भव्य रुपमा मनाउनका लागि सो दिन सार्वजनिक बिदासमेत दिदैँ आएको छ । 

 गोरखाको सहिद लखन गाउँपालिकाको प्रसिद्ध धार्मिक स्थल मनकामना मन्दिरको आमनेसामने उत्तरमा पर्ने यस मन्दिरमा पूजाआजा गरे इच्छाएको पूरा हुने तथा सन्तान नहुनेहरुका  लागि सन्तान प्राप्ती हुने धार्मिक विश्वास छ । मनकामना देवीको सात दिदी बहिनीमध्ये इच्छाकामना एक बहिनी रहेको किंवदन्ती रहेको छ ।इच्छाकामना मन्दिर धार्मिक पर्यटकीयस्थलको सम्भावना बोकेको पर्यटकीयस्थल हो ।समुद्री सतहदेखि एक हजार आठ सय मिटरको उचाइमा रहेको छ । इच्छाकामनाको वरपर जङ्गलले ढाकेको छ । फागुन र चैतमा ढकमक्क फुलेको लालीगुराँसले वरिपरिको वातावरण रङ्गीन बन्छ । इच्छाकामनाबाट सफा मौसममा हिमाली श्रृङ्खला मनास्लु, गणेश र माछापुच्छ्रेसम्म पनि देख्न सकिन्छ । 

मन्दिर पुर्ननिर्माण खानेपानी, विद्युत सेवा र अन्य भौतिक पुर्वाधारहरु निर्माण सगैँ यहाँ आउने धार्मिक पर्यटकहरुको आवागमन बढेको गाउँपालिका अध्यक्ष दान बहादुर गुरुङले बताउनुभयो । पछिल्लो केही बर्षयता भारतीय पर्यटकसमेत मन्दिर दर्शनका लागि आउन थालेको अध्यक्ष गुरुङले बताउनुभयो । फिस्लिङ–शक्तिखोर सडक र मुग्लिन–तामिन सडक प्रयोग गरेर पर्यटकहरू मन्दिर पुग्ने गरेका छन् । यहाँ सार्वजनिक विदा र शनिबारको दिन मन्दिर दर्शन गर्न र पिक्निक खान आउने पर्यटकहरुको घुइँचो लाग्ने गर्छन् ।