मझुवा, साउन २४ गते । गोरखा नगरपालिका–१३ को मझुवा–बैटारी–हटिया सडक कालोपत्रे भएको छ । 

गोरखा र तनुहँको  पुलको सिमानमा रहेको प्रमुख प्रवेशद्वारा नजिक रहेको सडक झण्डै ३३ वर्ष पछि पाँच सय मिटर सडक कालोपत्रे भएको हो ।

गोरखा नगरपालिकाको विशेष पहलमा नेपाली कांग्रेसकी राष्ट्रिय सभा सदस्य कमला पन्तको सांसद विकास कोषबाट ९६ लाख ४३ हजार ६२४ रुपियाँ रकम बजेटमार्फत सडक कालोपत्रे गरिएको हो । 

सडक कालोपत्र योजनाका लागि चिराग कन्ट्रक्सन प्रालिसँग २०८० साल जेठ ७  गते सम्झौता भएर भर्खर मात्रै सडक कालोपत्रे सम्पन्न भएको गोरखा नगरपालिका–१३ वडाध्यक्ष मित्रकुमारी नेपालीले जानकारी दिनुभयो । 

उहाँका अनुसार २०८१ साल जेठ ६ गते सम्पन्न गरिसक्नु पर्ने भएता पनि निर्माण कम्पनीले विविध कारण देखाउँदै सडक कालोपत्रे गर्न ढिला सुस्ती गर्दे आएकोमा साना सहरी विकास कार्यालय कास्कीले पटक पटक ताकेता गरेपछि निर्माण कम्पनीले झण्डै ३ वर्षपछि सडक कालोपत्र गरेको वडाध्यक्ष नेपालीले बताउनुभयो । 

उक्त सडक कालोपत्रे भएपछि १३ नम्बर भित्रका दराई गाउँ, जै कोट, फेदीखोला, सातदोबाटे, यु खर्क, बैटारी, सुनार गाउँ, तल्लो हटिया, मनमस्ता, सिमलथुम्की, ढकाल गाउँ बेलघारी, ठिमुरे र वडा नम्बर १४ को पर्यटकिय स्थल उपल्लो हटिया, कोट गाउँ, छाँकु र प्युघर, याङकोट, पुग्नलाई सहज हुने वडा अध्यक्ष नेपालीको भनाइ छ । 

विसं २०४९ सालमा ट्रयाक खोलेको सडक २०८२ सालमा सडक कालोपत्रे भएपछि स्थानियवासी खुसी भएका छन् । वडाध्यक्ष नेपालीले भन्नुभयो, ‘‘धेरै समयको पर्खाइपछि उक्त सडक कालेपत्रे भएपछि स्थानियहरूले उत्पादन गरेका तरकारी र मासुजन्य पशुपक्षी नजिकै रहेको आँबुखैरनी र गोरखा सदरमुकाम सम्म सहज रूपमा बिक्री गर्न सकिने भएकाले पनि स्थानियलाई राहत भएको छ ।’’