शिक्षाको गुणस्तर अभिवृद्धिका लागि प्रधानाध्यापकहरूको बैठक सम्पन्न

इच्छाकामना न्युज

१०, श्रावण २०८२

शिक्षाको गुणस्तर अभिवृद्धिका लागि प्रधानाध्यापकहरूको बैठक सम्पन्न

आँबुखैरेनी । आँबुखैरेनी गाउँपालिकाको आयोजनामा शुक्रबार एक महत्वपूर्ण शैक्षिक बैठक सम्पन्न भएको छ। गाउँपालिका अध्यक्ष शुक्र चुमानको अध्यक्षतामा सम्पन्न उक्त बैठकमा उपाध्यक्ष दुर्गा अर्याल, प्रमुख प्रशासकीय अधिकृत बुद्धिराम बस्नेत तथा गाउँपालिका अन्तर्गतका २५ वटै सामुदायिक विद्यालयका प्रधानाध्यापकहरू सहभागी थिए।

बैठकमा आर्थिक वर्ष २०८१/०८२ को शिक्षातर्फको शसर्त तथा आन्तरिक बजेटको प्रगति प्रतिवेदन प्रस्तुत गरिनुका साथै चालू आर्थिक वर्ष २०८२/०८३ को शिक्षा बजेट तथा कार्यक्रमहरूबारे विस्तृत छलफल गरिएको थियो।

यस्तै, शैक्षिक सत्र २०८२ को प्रथम त्रैमासिक परीक्षा सञ्चालनसम्बन्धी योजना, विद्यालयमा सिकाइलाई प्रभावकारी बनाउने उपाय, तथा विद्यालयहरूले अपनाउनु पर्ने शैक्षिक रणनीतिबारे पनि गहन छलफल भएको शिक्षा, युवा तथा खेलकुद शाखा प्रमुख निर्मला कुँवरले जानकारी दिनुभयो ।

बैठकमा सहभागी प्रधानाध्यापकहरूले आ–आफ्ना विद्यालयका सिकाइ अनुभवहरू आदान–प्रदान गर्दै असल अभ्यासलाई संस्थागत गर्न आवश्यक कदमहरू प्रस्तुत गरे।

बैठकमा विद्यालयको शिक्षण सिकाइ सुधारमा सबै पक्षले समन्वय गर्दै अगाडि बढ्नुपर्ने निष्कर्ष निकालिएको थियो।