चितवनमा १२९ खेलाडी सितोरियो करातेमा दीक्षित

इच्छाकामना न्युज

१७, कार्तिक २०८३

चितवनमा १२९ खेलाडी सितोरियो करातेमा दीक्षित

चितवन । चितवनमा बागमती प्रदेशस्तरीय सितोरियो कराते दीक्षान्त समारोह सम्पन्न भएको छ । नेपाल सितोरियो कराते संघको आयोजनामा भरतपुरस्थित कभर्डहलमा आयोजित समारोहमा १२९ जना खेलाडी दीक्षित भएका हुन् ।

तीन दिनसम्म सञ्चालन भएको कार्यक्रममा बागमती प्रदेशका चितवन, धादिङ र सिन्धुलीका खेलाडीहरूको सहभागिता रहेको थियो । सितोरियो कराते संघ बागमती प्रदेशका अध्यक्ष गगन लामाका अनुसार दीक्षित हुनेमध्ये ११३ जना प्रथम डान, १२ जना दोस्रो डान र चार जना तेस्रो डान प्राप्त गर्ने खेलाडी रहेका छन् ।

खेलाडीहरूलाई नेपाल सितोरियो कराते संघका प्रशिक्षक महेश कुमार श्रेष्ठले तीन दिनसम्म प्रशिक्षण दिएका थिए । समारोहका प्रमुख अतिथि नेपाल सितोरियो कराते संघका केन्द्रीय अध्यक्ष दावा गुरुङले खेलाडीहरूका लागि डान प्राप्त गर्नु आफैँमा उपलब्धि भएको बताउनुभयो । उहाँले आगामी दिनमा थप जिम्मेवार भएर राष्ट्रका लागि प्रतिस्पर्धा गर्न खेलाडीहरूलाई सुझाव दिनुभयो ।

त्यस्तै, चितवन जिल्ला खेलकुद विकास समितिका अध्यक्ष राजन कार्कीले सिकेको ज्ञान, सीप र अनुभवमार्फत नयाँ प्रतिभालाई प्रेरित गर्न खेलाडीहरूलाई आग्रह गर्नुभयो । उहाँले अन्तर्राष्ट्रिय स्तरमा नेपालको पहिचान स्थापित गर्न सफलताको शुभकामना पनि व्यक्त गर्नुभयो ।