म्याग्दी, माघ २ गते । म्याग्दी र मुस्ताङ भ्रमणका लागि आउने पर्यटकका लागि लक्षित गरेर कालिगण्डकी नदीमा जलयात्रा सुरु गरिएको छ । बेनीमा जारी आठौं म्याग्दी महोत्सवका अवसरमा कालिगण्डकीमा जलयात्रा सुरु भएको हो ।

पर्यटकले कालिगण्डकीमा जलयात्रा गरेर आनन्द लिनेछन् । बेनीको गलेश्वरदेखि कालिगण्डकी र म्याग्दी नदीको संगमस्थलसम्म जलयात्रा गरिनेछ । महोत्सवको अवलोकनका साथै म्याग्दी र मुस्ताङ घुम्न आउने पर्यटकको मनोरञ्जनका लागि कालिगण्डकी नदीमा जलयात्रा सुरु गरिएको महोत्सव आयोजक संस्था म्याग्दी उद्योग वाणिज्य सङ्घका महासचिव नारायण जिसीले बताउनुभयो ।

जलयात्रा गर्न चाहने पर्यटकका लागि महोत्सव गेट नजिक टिकट बिक्री कक्ष स्थापना गरिएको छ । नेपाल रिभर एक्स पोलर प्रालिले महोत्सव अवधिभर कालिगण्डकी नदीमा जलयात्रा गराउने छ । जलयात्राका लागि गलेश्वरदेखि बेनीको दोभान, पर्वतको नयाँपुल र मिर्मीसम्मको विभिन्न प्याकेज बनाइएको प्रालिका सञ्चालक सन्तोष गिरीले बताउनुभयो ।

उहाँले भन्नुभयो, ‘‘कालिगण्डकी नदीमा जलयात्रा गर्दा रमाइलो हुन्छ । यो सिजन कालिगण्डकी नदीमा जलयात्राका लागि उपयुक्त छ । सुरक्षाका उपायाहरु अपनाएर पर्यटकका लागि हामीले जलयात्रा गराउँछौं ।’’ गलेश्वर–बेनी तीन किलोमिटर दूरीको एक घण्टाको छोटो प्याकेजको जलयात्राका लागि प्रतिव्यक्ति आठसय शुल्क तोकिएको गिरीले जानकारी दिनुभयो ।

उहाँका अनुसार एक पटकमा आठदेखि दशजना सम्मले जलयात्रा गर्न सक्नेछन् । पर्यटककले इच्छाअनुसार बेनीदेखि मालढुङ्गा, नयाँ पुल, कुस्मा हुँदै मिर्मिसम्मको प्याकेजमा पनि जलयात्रा गराउने तयारी गरिएको प्रालिका सञ्चालक गिरीले बताउनुभयो ।