रोशन तिवारी, पर्वत, ३० माघ । कोरोना सङ्क्रमण फैलिने त्रासका कारण बन्द भएका होमस्टेहरु खुल्न थालेका छन् । पर्वत,  मोदी गाउँपालिकाको चित्रे, भुकदेउराली, देउराली लगाएतका स्थानमा रहेका होमस्टे १० महिना पछि सञ्चालनमा आएका हुन् । कोभिड १९ पछि बन्द भएको गण्डकी प्रदेशकै अग्रणी पर्वतको चित्रे स्थित सामुदायिक होमस्टेमा १० महिना पछि बल्ल पर्यटकको चहलपहल शुरु भएको छ । 
चित्रेबाट देखिने प्राकृतिक दृश्यका साथै गुरुङ जातिको मौलिक कलाले होमस्टेमा आउनेहरुको मन जित्छ । कोरोना महामारीभन्दा अगाडिसम्म वार्षिक ३ हजारभन्दा बढी पर्यटक होमस्टेमा पुग्ने गरेको तथ्याङ्क छ । विस्तारै सङ्क्रमण कम भएपछि होमस्टे खुल्दा साबिककै तुलनामा पर्यटकहरु आउन थालेको होमस्टे सञ्चालक सुसीला गुरुङले बताउनुभयो । यहाँका होमस्टे विदेशी पाहुनाहरु नआए पनि आन्तरिक पाहुनाहरुले भरिभराउ हुन थालेका छन् । पाहुना आएपछि होमस्टेको आम्दानी सुचारु भएको छ भने गाउँको अर्गानिक कृषि उत्पादनको खपत बढेको होमस्टे सञ्चालक गंगाबहादुर गुरुङले बताउनुभयो । मौलिक कलाको प्रचार र प्रवर्द्धन तथा पाहुनाको मनोरञ्जनका लागि साँझमा पञ्चेबाजा र भजन टोलीको फरक–फरक प्रस्तुतिले धेरैलाई रमाइलो लाग्ने गरेको होमस्टे सञ्चालकहरु बताउँछन् । 
जाडोको बेलामा ‘क्याम्प फायर’सहित पञ्चेबाजा र भजनको तालमा नाच्न पाउँदा होमस्टेमा पुग्नेहरु चित्रेमा रमाउने गरेको होमस्टे सञ्चालक समितिका सचिव मधुसोधन अधिकारीले बताउनुभयो । कोरोना सङ्क्रमणको महामारीले बन्द भएका होमस्टे पुनः खुल्ला भएर आम्दानी लिन शुरु गरेपनि फेरि महामारी बढेर बन्द गर्नुपर्ने अवस्था आउने हो कि भन्ने चिन्ता भने कायमै छ ।