कुरिनटार । नेकपा एमाले इच्छाकामना गाउँपालिका वडा नं. ४ को वडाध्यक्षमा घनश्याम सिलवाल ‘भोला’ सर्वसम्मत निर्वाचित भएको छ । आज मंगलबार सम्पन्न एमाले इच्छाकामना ४ को दोस्रो वडाअधिवेशनले सिलवालको अध्यक्षतामा ३५ सदस्यीय नयाँ वडासमिति चयन गरेको हो ।

अधिवेशनले समितिको उपाध्यक्षमा बुद्धिबल राना, सचिवमा तुलसी त्रिपाठी, उपसचिवमा राजु थापा मगर र फुलमाया गुरुङलाई सर्वसम्मत चयन गरेको छ । 

इच्छाकामना ४ का वडाकमिटि अध्यक्ष रामचन्द्र त्रिपाठीको सभापतित्वमा सम्पन्न अधिवेशनको समुद्घाटन समारोहको प्रमुख अतिथि बागमती प्रदेशका वन तथा वातावरण मन्त्री एवं नेकपा एमाले बागमती प्रदेश कमिटि सदस्य कृष्ण सिलवाल रहनुभएको थियो भने कार्यक्रममा नेकपा एमाले चितवन जिल्ला अध्यक्ष कमलराज पाठक, सचिव प्रकाश ढुङ्गाना, जिल्ला सदस्य एवं जिल्ला समन्वय समिति चितवन प्रमुख नारायण प्रसाद अधिकारी, जिल्ला सदस्य एवं इच्छाकामना गाउँपालिका अध्यक्ष दान बहादुर गुरुङ विशिष्ट अतिथि रहनुभएको थियो ।

कार्यक्रममा अतिथिको रुपमा नेकपा एमाले चितवनका जिल्ला सदस्यहरु रुद्र उप्रेती, जुना राजभण्डारी, ज्ञानु पाण्डे, माया सिलवाल लगायतको सहभागीता रहेको थियो ।

कार्यक्रमलाई सम्बोन्धन गर्दै कार्यक्रमका प्रमुख अतिथि  बागमती प्रदेशका वन तथा वातावरण मन्त्री एवं नेकपा एमाले बागमती प्रदेश कमिटि सदस्य कृष्ण सिलवालले नेकपा एमाले जनताको सुखदुःखमा साथ दिने पार्टी रहेको बताउनुभयो । सम्बोन्धनकै क्रममा उहाँले एमाले जनताको सुखदुःखको पार्टी भएकोले हरेक जनताको घरघरमा पुगेर जनताको साथमा एमाले छ भन्ने महशुस गर्ने गरी ग्रासरुटमा काम गर्न कार्यकर्ताहरुलाई निर्देशन दिनुभयो ।

साथै उहाँले इच्छाकामना हरेक वडाहरुलाई समृद्ध बनाउने आफ्नो पहिलो उद्देश्य रहेकोले नागरिकलाई उत्पादनसँग जोडेर काम गर्दै समृद्ध वडा निर्माणमा आफु सधैं लागिरहने बताउनुभयो ।

यसैगरी विशिष्ट अतिथिको रुपमा कार्यक्रममा सहभागी हुनुभएका नेकपा एमाले चितवन जिल्ला अध्यक्ष कमलराज पाठकले एमालेको वडा तथा पालिका अधिवेशनबाट अब बन्ने नयाँ कमिटिले २०७९ मा पार्टीले प्राप्त गरेको उपलब्धिलाई जोगाउदै हालको हैसियत नघट्ने गरी मिसन ८४ पूरा गर्नुपर्ने बताउनुभयो । साथै उहाँले मुलुकलाई हाल यथास्थितीमा राख्न केही तत्वहरु लागिपरेकोले यसको पहिचान एमालेले गरेको र त्यसलाई चिरेर अगाडी बढ्न एमाले लागिपरेको बताउनुभयो ।

यस्तै कार्यक्रममा बोल्ने क्रममा इच्छाकामना गाउँपालिका अध्यक्ष दान बहादुर गुरुङले एमालेबाट निर्वाचित जनप्रतिनिधिहरुले गरेका राम्रा कामहरुको पार्टीकै कार्यकर्ताहरुले प्रचार गर्न नखोजी उल्टै गुनासो मात्र गर्न खोज्ने प्रवित्ति बढेको बताउनुभयो । यस्तो कार्यले पार्टीलाई नै क्षति पुग्ने भन्दै उहाँले भन्दै चिन्ता व्यक्त गर्नुभयो ।