मायाटार । चितवनको इच्छाकामना २ स्थित दुम्किम हेप्चेक खनेपानी तथा सरसफाई परियोजना सम्पन्न भएको छ। आज गाउँपालिका अध्यक्ष दान बहादुर गुरुङले एक कार्यक्रमकाबिच उद्घाटन गर्नुभएको हो । वडा नम्बर २ को मायाटार, दुम्किम, घुर्केश र हेप्चेकका १२७ घरमा  एक घर एक धारा निर्माण गरिएको हो ।

गाउँपालिका, वाइट टु वाटर  र स्थानीयको साझेदारीमा आयोजना सम्पन्न भएको गाउँपालिका अध्यक्ष दान बहादुर गुरुङले बताउनुभयो । उहाँका अनुसार   साझेदारी संस्थाको ६५, गाउँपालिकाको २५ र स्थानीयवासीको १० प्रतिशत श्रमदानबाट आयोजना सम्पन्न भएको हो ।  ७९ लाख ७७ हजार रुपैयाँमा  आयोजना सम्पन्न भएको हो । 

उहाँका अनुसार १२७ वटै घरमा  सौचालय पनि निर्माण गरिएको छ । गाउँपालिकाले सामुदायिक र  विपन्न गरि २५ वटा सौचालय निर्माणका लागि आर्थिक  सहयोग  समेत प्रदान गरेका थिए । 

वाइन टु वाटरकी राष्ट्रिय निर्देशक रोशनी कार्कीले त्रिपक्षीय साझेदारीमा गरिएको काम समयमै सम्पन्न भएको बताउनुभयो । वाइन टु वाटर आधारभूत सुविधामा पहुँच नपुगेका समुदायको जीवनस्तर  परिवर्तनमा क्रियाशील रहेकोे बताउनुभयो ।

उद्घाटन कार्यक्रममा प्रमुख प्रशासकिय अधिकृत चन्द्रकान्त बस्नेत ,वडाध्यक्ष पञ्च बहादुर चेपाङ, लगायत स्थानीयहरुको उपस्थिति रहेको थियो । बुधबार मात्र वडा नम्बर २ कै छापडाडाँमा ५५ वटा धाराको उद्घाटन गरिएको गाउँपालिका अध्यक्ष गुरुङले बताउनुभयो । उहाँका अनुसार उक्त आयोजना ९० लाखमा सम्पन्न भएको हो । बर्षौँदेखि खाने पानीको अभाव झेल्दै आएका यहाँका स्थानीयहरु खुशी  भएका  छन् । 

गाउँपालिकाले वाइन टु वाटर र स्थानीयको साझेदारीमा यस आर्थिक बर्षमा २६५ धारा निर्माण सम्पन्न गरेको अध्यक्ष गुरुङले जानकारी दिनुभयो ।