मायाटार । चितवनको इच्छाकामना गाउँपालिका वडा नं. २ स्थित मायाटार आसपासका गाउँहरुमा आजदेखि बिजुली बत्ती पुगेको छ । इच्छाकामना गाँपालिका अध्यक्ष दान बहादुर गुरुङले विजुलीको स्वीच अन गरी समुद्घाटन गरी बिजुली बत्तीको उद्घाटन गर्नुभयो ।

गाउँपालिकाको ७ वटा वडामध्य बिजुली बत्ती बिहिन वडाको रुपमा रहेको वडा नं. २ मै पहिलो पटक बिजुली बत्ती बलेको हो । पहिलो चरणमा मायाटार, दुम्किन, तेर्से, घुर्केश, डाडाँगाउँ, हेप्चेक, वल्र्याङ लगायतका गाउँहरुमा बत्ती बलेको  गाउँपालिका अध्यक्ष दान बहादुर गुरुङले बताउनुभएको छ । उहाँका अनुसार अहिलेसम्म इच्छाकामना गाउँपालिकाको ५ वटा वडाको सबै स्थानमा बिजुली बत्ती पुगिसकेको छ भने वडा नं. १ र २ को केही गाउँहरुमा बाँकी रहेको छ । जस अनुसार गाउँपालिकाको करिब ८० प्रतिशत भन्दा बढि गाउँहरुमा बिजुली बालिसकिएको छ ।

यस्तै यहि २०८१ वैशाख महिना भित्र पालिकाको बाँकी वडाका गाउँहरुमा समेत बिजुली बत्ति पुर्‍याई उज्यालो इच्छाकामना अभियान अन्तर्गत इच्छाकामना गाउँपालिकालाई उज्यालो इच्छाकामना घोषणा गर्ने तयारी भैरहेको अध्यक्ष गुरुङले बताउनुभयो ।

यसैगरी आज मायाटारमा बिजुली बत्ती समुद्घाटन कार्यक्रममा गाउँपालिकाका विपन्न ६० घर परिवारलाई विद्युत मिटर, सर्भिस केबल र एम.सी.बी. निःशुल्क वितरण पनि गरिएको गाउँपालिकाका प्रमुख प्रशासकीय अधिकृत चन्द्रकान्त बस्नेतले बताउनुभयो । नेपाल विद्युत प्राधिकरण भरतपुर वितरण केन्द्रसँगको सहकार्यमा गाउँपालिकाले अनुदानमा अति विपन्न ६० घरका लागि विद्युत मिटर, सर्भिस केबल र एम.सी.बी. निःशुल्क वितरण गरिएको उहाँले बताउनुभयो ।

कार्यक्रममा इच्छाकामना गाउँपालिका अध्यक्ष दान बहादुर गुरुङ, प्रमुख प्रशासकीय अधिकृत चन्द्रकान्त बस्नेत, नेपाल विद्युत प्राधिकरण भरतपुर वितरण केन्द्रका प्रमुख रामु श्रेष्ठ, वडाध्यक्ष पञ्च बहादुर चेपाङ लगायतको उपस्थित रहनुभएको थियो ।

गाउँमा पहिलो पटक बत्ती बलेपछि स्थानीय खुशी भएका छन् । मायाटारमा होमस्टे सञ्चालन गर्दै आउनु भएका टिका गुरुङले पहिलो पटक गाउँमा बत्ती बल्दा आफुहरु खुशी भएको बताउँनु भयो । गाउँमा बत्ती बलेसगैँ मोवाईल चार्ज गर्न विद्यार्थीहरुलाई पढ्न सहज भएको उहाँले बताउनु भयो ।  साथै उहाँले होमस्टे आउने पाहुँनाहरुलाई बास बस्नका लागि सहज हुने बताउँनु भयो ।