कुरिनटार । चितवनको इच्छाकामनामा फागुन १३ गतेदेखि बालबालिकाहरुलाई दादुरा– रुबेला विरुद्धको खोप लगाइने भएको छ । नौ महिनादेखि १५ बर्ष उमेर समूहका बालबालिकाहरुलाई  खोप लगाउन लागिएको हो ।  

फागुन १३ गतेदेखी फागुन २२ गते सम्म  सञ्चालन हुने खोप अभियानमा इच्छाकामनाका १० हजार ५६जना बालबालिकाहरुलाई खोप लगाइने गाउँपालिका स्वास्थ्य शाखा प्रमुख जनस्वास्थ्य निरीक्षक  हरि देवकोटाले  बताउनुभयो । अभियान अन्तरगत मंगलबार गाउँपालिका कार्यालयमा आयोजना गरिएको पालिका स्तरीय खोप समन्वय समितिको बैठक तथा अभिमूखीकरणमा सो जानकारी गराइएको हो ।  

उहाँका अनुसार ५२ वटा विद्यालय र १२ वटा स्वास्थ्य केन्द्र गरि ६४ वटा खोपकेन्द्र मार्फत खोप लगाइने छ । अभियानको क्रममा विगतमा खोप लगाउन छुटेका  ९ महिनादेखि ५ बर्ष मुनिका बालबालिकालाई   डिपिटि, पिसिभी र आईपिभि खोप लगाइने उहाँले बताउनुभयो । खोप अभियानका लागि आवश्यक पर्ने सामाग्रीहरु सबै स्वस्थ्य केन्द्रका प्रमुखहरु मार्फत हस्तान्तरण गरिसकेको उहाँले बताउनुभयो ।उहाँका अनुसार वडा स्तरीय  खोप समन्वय समितिलाई अभिमूखीकरण तालिम  दिइने छ ।  साथै उहाँले  सूचना प्रवाह  गर्न सञ्चार माध्यममा सुचना प्रशारण लगायत  क्लब  आमा समूह, टोल विकास संस्था लगायतलाई यस अभियानमा परिचालन गरिने बताउनुभयो । 

जनस्वास्थ्य कार्यालय चितवनका जनस्वास्थ्य निरीक्षक पुर्षोतम अर्यालले गत बर्षमा बालबालिकामा दादुरा(रुबेला  सङ्क्रमण देखापरेपछि राष्ट्रिय रुपमा देशभर खोप अभियान सञ्चालन गरिएको  बताउनुभयो ।  दादुरा–रुबेला  उन्मूलनको अन्तिम चरणमा आइपुग्दा  यो रोग देखापरेपछि  पुन  देशभर खोप अभियान सञ्चालन गरिएको बताउनुभयो । चितवनमा पनि ५२ जनामा देखा परेको उहाँले बताउनुभयो । 

उहाँका अनुसार चितवनमा  विसं २०७९ मङ्सिर ३ गते देखि २०८० पुस १५ गते सम्म ५२ जनामा दादुरा–रुबेला रोगको सङ्क्रमण देखिएको हो । जिल्लामा भेटिएका सङ्क्रमितमध्ये अधिकांश इच्छाकामना गाउँपालिकाका रहेका रहेका छन् ।केही सङ्ख्यामा राप्ती नगरपालिकामासमेत यो रोगको सङ्क्रमण रहेको स्वास्थ्य कार्यालय चितवनले जनाएको छ । 

गाउँपालिका उपाध्यक्ष माया सिलवालले खोप अभियान सफल पार्नका लागि स्वास्थ्यकर्मी,कर्मचारी, वडाध्यक्ष लगायत सबै जनप्रनिधिहरुलाई लागी पर्न आग्रह गर्नुभयो ।  यस अभियानमा सबै बालबालिकाहरुलाई समावेश गराउन जनप्रतिनिधिहरुले सहजीकरण गर्न आवश्यक हुने उहाँको भनाई छ । जनप्रतिनिधिले भनेको अभिभावकहरुले मान्ने भन्दै सहजीकरण गर्न आग्रह गर्नुभएको हो । कार्यक्रममा जनप्रतिनिधि स्वास्थ्यकर्मी , पत्रकार लगायतको सहभागिता रहेका थिए ।  

चितवनमा एक लाख ६१ हजार बालबालिकालाई दादुरा–रुबेला विरुद्धको खोप लगाइने स्वास्थ्य कार्यालय चितवनले जनाएको छ । स्वास्थ्य कार्यालय चितवनले अभियानलाई दुई चरणमा विभाजन गरेर सञ्चालन गर्ने छ ।  पहिलो चरणमा भरतपुर महानगरपालिका, माडी नगरपालिका र इच्छाकामना गाउँपािलकामा १३ गते देखि २२ गते सम्म अभियान सञ्चालन हुने छ । राप्ती खैरहनी, रत्ननगर र कालिका नगरपालिकामा भने दोस्रो चरणमा फागुन २३ गतेदेखि चैत १ गतेसम्म सञ्चालन हुने कार्यालयले जनाएको छ ।