आँबुखैरेनीका ३ युवा अवैध लागूऔषध सहित रंगेहात पक्राउ

इच्छाकामना न्युज

२१, माघ २०८०

आँबुखैरेनीका ३ युवा अवैध लागूऔषध सहित रंगेहात पक्राउ

आँबुखैरेनी । तनहुँको आँबुखैरेनी गाउँपालिकाका ३ जना युवा अवैध लागुऔषध सहित रंगेहात पक्राउ परेको छ । इलाका प्रहरी कार्यालय आँबुखैरेनीको प्रहरी टोलीले शुक्रबार अवैध लागुऔषध सहित उनीहरुलाई दुई स्थानबाट छुट्टाछुट्टै अवस्थामा रंगेहात पक्राउ गरेको हो ।

पक्राउ पर्नेहरुमा आँबुखैरेनी गाउँपालिका वडा नं. २ ढकालटारका ३४ वर्षीय जिवन भन्ने गिर बहादुर मगर, २५ वर्षीय भरत भन्ने ओम बहादुर मगर र १९ वर्षका रितेश थापा मगर रहेको प्रहरीले जानकारी दिएको छ ।

प्रहरीले दिएको जानकारी अनुसार जिवन भन्ने गिर बहादुर मगरलाई शुक्रबार दिउँसो १ बजे ढकालटारमा शंकास्पद अवस्थामा बसिरहेको बेला खानतलासी गर्दा निजले बोकेको हरियो रंगको फेन्सी झोलामा लुकाई छिपाई ल्याएको डाइजापाम १२१ एम्पुल, फेनेरगन १२३ एम्पुल र बुप्रीनरफिन १२६ एम्पुल गरि ३७० एम्पुल लागुऔषध सहित पक्राउ गरेको हो । उनको साथबाट प्रहरीले नाइट्रेभेट–१० लेखिएको २० पत्ता गरि ३०० ट्याब्लेट समेत बरामद गरेको छ ।

यस्तै आँबुखैरेनी ३ पानीघट्टबाट शुक्रबार मध्यान्ह १२ः३० बजे पक्राउ परेका भरत भन्ने ओम बहादुर मगर र रितेश थापा मगरबाट प्रहरीले डाइजापाम ९ एम्पुल, फेनेरगन ९ एम्पुल र बुप्रीनरफिन ९ एम्पुल गरि २७ एम्पुलका साथै नाइट्रेभेट–१० लेखिएको ४३ ट्याब्लेट बरामद गरेको प्रहरीले जानकारी दिएको छ ।

पक्राउ परेका तीनै जनालाई आइतबार जिल्ला अदालत तनहुँबाट म्याद थप गरि अनुसन्धानका लागि हिरासतमा राखिएको इलाका प्रहरी कार्यालय आँबुखैरेनीले जानकारी दिएको छ ।