आँबुखैरेनी । तनहुँ जिल्लाको उच्च भूमिमा रहेको छिम्केश्वरी माध्यमिक विद्यालयले आज विविध कार्यक्रम गरी हीरक जयन्ती भव्य रुपले मनाएको छ । आँबुखैरेनी गाउँपालिका वडा नं. ४ , भाँगे अक्लाङ्ग स्थित विद्यालयको प्राङ्गणमा एक समारोहको आयोजना गरी विद्यालय व्यवस्थापन समितीका अध्यक्ष जुद्ध बहादुर थापाको सभापतित्व तथा आँबुखैरेनी गाउँपालिका अध्यक्ष शुक्र चुमानको प्रमुख आतिथ्यतामा हीरक महोत्सव–२०७९(६० औं बर्ष) अभिभावक भेला तथा पुर्नमिलन समारोह भव्य रुपले सम्पन्न भएको हो ।
हीरक स्तम्भ अनावरण, हीरक स्मारिका विमोचन, भूपु विद्यार्थी, शिक्षक पुर्नमिलन समारोह, सम्मान कार्यक्रम तथा विविध लोक साँस्कृतिक कार्यक्रम गरी हीरक जयन्ती भव्य रुपले मनाईएकोे थियो ।
सो अवसरमा जग्गादाता डम्बर बहादुर खवास, जुद्ध बहादुर खवास, चन्दादाता धनकाजी आले, पूर्व प्रधानाध्यापक सुदर्शन अर्याल, डोलमाया गुरुङ, सँस्थापक सदस्य बाबुराम तिवारी, विद्यालयका उत्कृष्ट शिक्षिका दिलमाया मश्राङीलाई सम्मान गरिएको विद्यालयका प्रधानाध्यापक राजेन्द्र न्यौंपानेले जानकारी दिनुभयो ।
हीरक महोत्सव समारोहलाई सम्बोधन गर्दै आँबुखैरेनी गाउँपालिका अध्यक्ष शुक्र चुमानले सामुदायिक विधालयमा गुणस्तरीय शिक्षा प्रदान गर्ने प्रतिबद्धता व्यक्त गर्नुभएको छ । उहाँले भन्नुभयो, विद्यालयमा दुइ चार जना विद्यार्थी भएर हुँदैन ।
धेरै विद्यार्थी हुनुपर्दछ अनि गुणस्तर हुन्छ । आफ्नो गाउँमा भएको विद्यालय मर्च गर्न पाइँदैन भन्नेले बालिका भने अन्तत्र पढाएको हुने गरेको उनले बताए । गाउँमा रहेको विद्यालयले जति सम्म शिक्षा दिन सक्ने हो त्यतिसम्मको कक्षा मात्र चलाउनुपर्ने उनले बताए ।
दुइ जना शिक्षक राखेर मावि चलाउँछु भन्दा विद्यार्थीहरुको भविष्य अन्यौल हुने भएकाले त्यसतर्फ पालिकाले योजना बनाइरहेको बताए । कार्यक्रममा वडा नम्बर ४ का वडा अध्यक्ष मिलन भुजेल, शिक्षा शाखा प्रमुख निर्मला कुँवर, मस्र्याङ्गदी बालज्योती बोर्डिङ स्कुलका प्रिन्सिपल भगवानदास मल्ल, पूर्व प्रअ सुदर्शन अर्याल, आँबु प्राविका प्रअ लक्ष्मण गुरुङ, विद्यालय व्यवस्थापन समितिका सदस्य देवनारायण खवास, विद्यार्थी भुवल सोमै लगायतले मन्तव्य राखेका थिए ।
विद्यालयका शिक्षकद्वय काशीनाथ देवकोटा र पूर्णिमा थापाले संचालन गर्नुभएको हीरक महोत्सव–२०७९(६० औं बर्ष) अभिभावक भेला तथा पुर्नमिलन समारोहमा प्रधानाध्यापक राजेन्द्र न्यौपानले प्रगति प्रतिवेदन पेश गरेका थिए ।
.png)
