मंसिर ४ पछि झुपडीबाट परिवर्तन सुरु हुन्छः विक्रम पाण्डे

इच्छाकामना न्युज

२७, कार्तिक २०७९

मंसिर ४ पछि झुपडीबाट परिवर्तन सुरु हुन्छः विक्रम पाण्डे

भरतपुर । राप्रपाका वरिष्ठ उपाध्यक्ष विक्रम पाण्डेले मंसिर ४ पछि गरिबको झुपडीबाट परिवर्तन सुरू हुने बताउनुभएको छ। नियमित चुनावी घरदैलो अभियानका क्रममा भरतपुर–९ शरदपुरस्थिच झेर्नी मगर समूहले आयोजना गरेको चुनावी सभालाई सम्बोधन गर्दै यसपटकको निर्वाचनपछि विपन्न र गरिब तथा सुकुमबासीको झुपडीबाट विकासको लहर बाहिर आउने बताउनुभएको हो।

यसअघिका धेरै निर्वाचनमा धेरै दल र नेताले ठूलाठूला कुरा गरेर काम नगरे पनि अबको निर्वाचनपछि भने आफूले झुपडीबाट विकास र परिवर्तनको बीउ रोप्ने बताउनुभएको हो। ‘विकास र परिवर्तन भन्ने कुरा अभाव र संकटपूर्ण स्थानबाट सुरु हुन्छ,’ उहाँले भन्नुभयो, ‘त्यसैले मंसिर ४ पछि जहाँ विकासले पाइला टेकेको छैन, त्यहीँबाट विकासको सुरुवात हुन्छ भने जहाँ सुकुमबासी छन्, जो झुपडीमा बसिरहनुभएको छ, त्यहीँबाट परिवर्तनको सुरुवात हुनेछ।’

विपन्नलाई माथि नउठाएसम्म दलहरुले तिनैमाथि राजनीति गरिरहने हुँदा त्यसको अन्त्यको लागि पनि सुकुमबासी समस्या समाधान गर्ने योजना लिएर यसपटकको निर्वाचनमा होमिएको उहाँले बताउनुभयो। यसअघिका कुनै पनि दल र उम्मेदवारले आफूले बोलेका कुरा पूरा गरिदिएको भए गएको पाँच वर्षमा नेपाल स्वर्ग बनिसक्नेसमेत उहाँले बताउनुभयो।