आठौँ संस्करणको आईसीसी टी–ट्वान्टी विश्वकप क्रिकेट आजबाट सुरु

एजेन्सी

३०, आश्विन २०७९

अष्ट्रेलिया । आठौँ संस्करणको आईसीसी टी–ट्वान्टी विश्वकप क्रिकेट आजबाटसुरु हुँदैछ । अष्ट्रेलियाको भिक्टोरियामा सुरु हुने प्रतियोगिताको पहिलो राउण्ड अन्तर्गत समूह ‘ए’ का दुई खेलहरू हुँदैछन् । उद्घाटन खेलमा नामिबिया र श्रीलङ्काबीच प्रतिस्पर्धा हुनेछ । जीएमएचबीए मैदानमा हुने खेल नेपाली समय अनुसार बिहान ९ः४५ मा सुरु हुनेछ ।

आजै नै हुने दोस्रो खेलमा समूह ‘ए’ का यूएई र नेदरल्यान्ड्सबीच नेपाली समय अनुसार दिउँसो १ः४५ मा सुरु हुनेछ । विश्वकपमा १६ राष्ट्र सहभागी छन् ।

१६ टोलीमा ८ टोलीले पहिलो राउण्ड खेल्नेछन् ।पहिलो चरणमा ४÷४ टोलीको दुई समूह रहेकोमा दुबै समूहका शीर्ष दुई टोली दोस्रो राउण्डका लागि छनोट हुनेछन् ।पहिलो राउण्डको समूह ‘ए’ मा श्रीलङ्का,नामिबीया,यूएई र नेदरल्यान्ड्स रहेका छन् । समूह ‘बी’ मा वेस्ट इण्डिज,जिम्बाबे,आयरल्याण्ड्स र स्कटल्याण्ड रहेका छन् ।

दोस्रो राउन्डमा पुगिसकेका आठ टोली र पहिलो राउण्डबाट आउने चार टोली पुनः सुपर १२ मा खेल्नेछन् । यसमा रहेका १२ टोलीलाई पनि ६÷६ टोली गरी दुई समूहमा विभाजन गरिने छ ।

दुई समूहका शीर्ष २२ टोली सेमिफाईनलमा पुग्ने छन् । सुपर १२ को समूह एकमा अष्ट्रेलिया,न्युजिल्याण्ड,अफगानस्तान,इंग्ल्याण्ड, पहिलो राउण्ड समूह ‘ए’ को बिजेता र पहिलो राउण्ड समूह ‘बी’ को उपबिजेता रहनेछन् ।

समूह दुईमा भारत,पाकिस्तान,दक्षिण अफ्रिका,बङ्गलादेश,पहिलो राउण्ड समूह ‘बी’ को विजेता र पहिलो राउण्ड समूह ‘ए’ को उपबिजेता रहने छन् ।यस विश्वकपको फाईनल खेल भने १३ नोभेम्बरमा हुनेछ ।