सिमलढाप । गएराति देखि परेको अविरल वर्षासँगै आएको बाढिले चितवनको इच्छाकामना गाउँपालिका वडा नं. ७ स्थित थानखोलामा रहेको डाईभर्सन बगाएको छ । डाईभर्सन बगाएसँगै इच्छाकामना गाउँपालिका ७ स्थित भालुमारा, सुन्दरवस्ती हुदै कालिका नगरपालिका निस्कने सडक यातायात अवरुद्ध भएको छ ।

सडक अवरुद्ध भएसँगै स्थानीयलाई नजिकको बजार पुग्नलाई असहज भएको इच्छाकामना गाउँपालिका ७ का वडाध्यक्ष विजय थापाले बताए। बाढीले ६ वटा ह्युम पाईप राखेर बनाईएको डाईभर्सनको छेउपट्टिको भाग बगाइदिएको उनले बताए। उनका अनुसार वर्षासँगै उक्त वडामा रहेका विभिन्न खहरे खोलाहरुमा पानीको मात्रा बढ्दा जोखिम बढेको छ ।

यस्तै बाढिले थानखोलाको डाईभर्सन बगाएर सडक अवरुद्ध पारेपछि गाउँपालिका अध्यक्ष दान बहादुर गुरुङले तत्कालै स्थलगत अवलोकन गरेको छ । क्षतिग्रस्त स्थलको अवलोकन पश्चात वर्षा रोकिए र बाढी कम हुने वित्तिकै तत्काल डाइभर्सन निर्माण गरी अस्थायी रुपमा सडक संचालन सुरु गरिने गाउँपालिका अध्यक्ष दान बहादुर गुरुङले बताए। यो स्थानमा वर्षा हुने वित्तिकै सधै समस्या उत्पन्न हुने हुदाँ आगामी दिनमा स्थायी समाधान खोजिने उनले बताए।

‘अघिल्लो स्थानीय सरकारको वेवास्ताका कारण वर्षौदेखि यहाँका जनताले यो समस्या भोग्नुपरेको हो, अब हामी यो समस्याको दीर्घकालीन समाधान गनेछौं।’ उनले भने ‘संघिय सरकारबाट ३ पटकसम्म बहुवर्षीय योजना अन्तर्गत हरेक वर्ष ५० लाख रुपैयाँ थानखोलामा पुल बनाउन बजेट आएको थियो तर तात्कालीन स्थानीय सरकारले यो काम गर्नै चाहेन ।’

अब भने आफुहरुले थानखोलामा मोटरेबल पक्की पुल बनाउन प्रक्रिया अगाडी बढाउने र आफ्नो कार्यकाल भित्र निर्माण सम्पन्न गराउने उनले बताए।