कुरिनटार, ३१ असार । इच्छाकामना साहित्य प्रवाहले खुल्ला कविता प्रतियोगिता तथा श्रष्टा सम्मान कार्यक्रम सम्पन्न गरेको छ । २०९औँ भानुजयन्तीका अवसर पारेर शुक्रबार खुल्ला कविता प्रतियोगिता एवं स्रष्टा सम्मान कार्यक्रम सम्पन्न गरेको हो ।

इच्छाकामना साहित्य प्रवाहका अध्यक्ष एकराज शर्माको अध्यक्षता तथा गाउँपालिका अध्यक्ष दानबहादुर गुरुङको प्रमुख आतिथ्यता ,उपाध्यक्ष मायाँ सिलवालको विशिष्ट आतिथ्यता तथा वार्डनं. ४ का अध्यक्ष रुद्र उप्रेतीको आतिथ्यतामा इच्छाकामना साहित्य प्रवाहका वर्तमान तथा पूर्व कार्यसमिति तथा सल्लाहकार समिति साथै साहित्यानुरागी शिक्षक तथा विद्यार्थीहरू लगायत साहित्य प्रेमीहरुको सहभागीतामा सर्वशान्ति मावि कुरिनटारमा कार्यक्रम सम्पन्न भएको हो ।

स्रष्टा सम्मान अन्तरगत “कालो नैवेद्य“ कविता कृतिका लागि कृष्णप्रसाद पोखरेल र “मनकली“ उपन्यास कृतिका लागि विमला अधिकारी देवकोटालाई पुरस्कृत गरिएको थियो । उहाँहरुलाई जनही रु ५,१०० सहित प्रमाणपत्र र दोसल्ला सहित सहित सम्मान गरिएको हो ।

कविता प्रतियोगितामा विमला अधिकारी देवकोटा प्रथम, ध्रुब अधिकारी द्वितीय र सर्वशानित माविमा कक्षा १० मा  अध्ययनरत राजु परियार तृतीय हुनुभएको थियो ।प्रमुख अतिथि तथा विशिष्ट अतिथिको बाहुली बाट पुरस्कार तथा सम्मान प्रदान गरिएको थियो ।
प्रमुख अतिथि दान बहादुर गुरुङले इच्छाकामना साहित्य प्रवाहको उत्तरोत्तर प्रगतिको कामना गर्दै साहित्य,कला संस्कृतिको प्रवर्धनका लागि गाउँपालिकाबाट सहयोग गर्ने प्रतिवद्धता व्यक्त गर्नुभयो ।

कार्यक्रममा कवि रामनाथ त्रिपाठी,सुदर्शन कट्टेल र लेखकुमारी सापकोटाबाट कविता वाचन गर्नुभएको थियो ।
यसैबिच साहित्य प्रवाहलाई संस्थाका अध्यक्ष एकराज शर्माले रु १० हजार र पूर्व अध्यक्ष कृष्णप्रसाद सिलवालले रु ६ हजार आर्थिक सहयोग गर्नुभएको थियो ।

कार्यक्रम प्रवाहका सचिव शंकर सिलवालले संचालन गर्नुभएको थियो । कार्यक्रममा अतिथिहरुलाई मायाको चिनो समेत प्रदान गरिएको थियो ।