मोरङ । मोरङमा बीभत्स हत्या गरिएको एक नाबालिकाको शव फेला परेको छ।

सुनवर्षी नगरपालिका–९ डाइनियास्थित मुस्लिम टोलकी ४ वर्षीया नाबालिका कायानत खातुनको हत्या भएको अवस्थामा बीभत्स शव फेला परेको छ। उनी स्थानीय जफारुल मियाँकी छोरी हुन्।

नाबालिका घरबाट हराएको केही समयपछि नजिकै रहेको घाँसघारीमा बीभत्स अवस्थामा शव भेटिएको हो। मोरङका प्रहरी प्रमुख एसपी कवित कटवालका अनुसार शुक्रबार अपराह्नदेखि बालिका हराएकी थिइन्। परिवार र स्थानीयले खोजी गर्ने क्रममा घरबाट करिब २०० मिटर पूर्वतर्फ रहेको घारीमा शुक्रबार साँझ उनको शव फेला परेको हो।

घटनाको जानकारी प्राप्त हुनासाथ एसपी कटवाल स्वयं घटनास्थल पुगेर अनुसन्धानमा खटिएका थिए। प्रहरीका अनुसार बालिकाको निधार र कन्चटमा गहिरो चोट देखिएको छ। शव फेला पर्दा शरीरको माथिल्लो भागमा कपडा थिएन भने तल्लो भागमा भने कपडा लगाएकै अवस्थामा थियो। प्रहरीका अनुसार बालिका घरबाट हराउँदा पनि माथिल्लो भागमा कपडा नलगाएको जानकारी आएको छ।

घटनास्थलको अवस्था र प्रारम्भिक अनुसन्धानका आधारमा तत्काल बलात्कार भएको संकेत नदेखिएको एसपी कटवालले बताए। उनका अनुसार घटनाको प्रकृति हेर्दा अभिभावकसँगको कुनै पुरानो रिसइबीका कारण बालिकाको हत्या गरेर शव घारीमा फालिएको हुन सक्ने आशंका गरिएको छ। यद्यपि, यसको पुष्टि हुन बाँकी रहेको उनले बताए।

शवलाई पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ। एसपी कटवालका अनुसार हत्याको कारण, घटनामा संलग्न व्यक्ति र घटनाको वास्तविक परिस्थिति अझै खुल्न सकेको छैन।