कुनिरटार । स्थानीय तहको कार्यसम्पादन मूल्याङ्कनमा चितवनको इच्छाकामना गाउँपालिका जिल्ला प्रथम भएको छ । राष्ट्रिय प्राकृतिक स्रोत तथा वित्त आयोगले बिहीबार सार्वजनिक गरेको नतिजा अनुसार जिल्लाका ७ वटा पालिका मध्य इच्छाकामना प्रथम भएको हो । 

आयोगले १७ वटा सूचकमा अङ्कसहित स्थानीय तहको मूल्याङ्कन गरेको हो । सो नतिजा अनुसार इच्छाकामनाले यसवर्ष ७४.३३ अङ्क ल्याई चितवनका अन्य छ पालिकालाई उछिनेको हो । अघिल्लो वर्ष इच्छाकामनाले ७२ अङ्क ल्याएको थियो ।

इच्छाकामनाले पाएको अङ्कलाई नियालेर हेर्दा जिल्लाभर प्रथम हुनुका साथै बागमती प्रदेशभरका पालिकाहरु मध्य चौथो र प्रदशकै गाउँपालिकाहरु मध्यमा पनि पहिलो स्थानमा छ । 

आयोगको नतिजा अनुसार  भरतपुर महानगरपालिकाले ६८.४, माडी नगरपालिका ६७.१३, खैरहनी नगरपालिकाले ६५.१०, कालिका नगरपालिकाले ६४.५२
रत्ननगर नगरपालिकाले ६३.२३ र राप्ती नगरपालिकाले जम्मा ३६.२० अङ्क ल्याएको छ । 

चितवनको राप्ती नगरपालिका वित्त आयोगको मूल्याङ्कनमा ‘फेल’ भएको छ । राप्ती नगरपालिकाले जम्मा ३६।२० अङ्क ल्याएको छ । अघिल्लो वर्ष राप्तीको ४३।३ अङ्क आएको थियो । देशभरमा सबैभन्दा कम अङ्क ल्याउने पालिकाभित्र राप्ती नगरपालिकाको नाम छ ।

राष्ट्रिय प्राकृतिक स्रोत तथा वित्त आयोगले गरेको कुल १७ सूचकको मूल्याङ्कनमा असार १० गतेभित्र बजेट सार्वजनिक गरे/नगरेको, असार मसान्तभित्र बजेट पास गरे/नगरेको विषय छ । राप्ती नगरपालिकाले गत असार १० भित्र बजेट ल्याउन सकेको थिएन । घरजग्गा रजिष्ट्रेसन शुल्क, मनोरञ्जन कर तथा विज्ञापन करबापत उठेको रकममध्ये प्रदेश सरकारलाई दिनुपर्ने ४० प्रतिशत रकम मासिक प्रदेश सञ्चित कोषमा दाखिला गरे/नगरेकोसमेत मूल्याङ्कन गरिएको थियो ।

आयोगका सूचना अधिकारी तथा उपसचिव विश्वरुप दाहालका अनुसार पालिकाको राजस्व परिचालन, बजेट खर्चको अवस्था, बेरूजु, सूत्र सफ्टवेयर प्रयोग, विद्यार्थी भर्नादर, कक्षा ९ मा विद्यार्थी टिकाउ दर, गर्भ जाँच गर्ने महिला अनुपात, एसइई परीक्षाको नतिजा, खोप लगाएका बालबालिकाको अनुपातको विषयमा पनि मूल्याङ्कन गरिएको थियो ।
आगामी आवको बजेट प्रक्षेपणसहित विवरण अर्थ मन्त्रालयमा बुझाए/नबुझाएको, बजेट समीक्षा गरी कात्तिक मसान्तभित्र सार्वजनिक गरे/नगरेको विषयमा पनि मूल्याङ्कन गरिएको थियो ।

माडी, रत्ननगर, खैरहनी नगरपालिकाले चारपटक गर्भ जाँच गर्ने महिलाको अनुपात, संस्थागत स्वास्थ्य संस्थामा सुत्केरी हुनेको महिलाको अनुपात, पूर्णखोप पाएका बालबालिकाको अनुपातका कागजात नै बुझाएनन्, जसका कारण यी विषयमा शून्य अङ्क पाए । भरतपुरले पनि पूर्णखोप बालबालिकाको अनुपातको कागजात पेस गर्न सकेन, यसमा भरतपुरको शून्य अङ्क छ ।

राप्ती नगरपालिकाको १७ सूचकमध्ये सातवटा सूचकमा शून्य अङ्क छ । कालिकाको पाँचवटा सूचकमा शून्य छ, इच्छाकामना चार सूचकमा शून्य छ, भरतपुर तीन सूचकमा शून्य छ । रत्ननगर र खैरहनीको छवटा सूचकमा शून्य अङ्क छ ।