कुयलघारी । चितवनको इच्छाकामना गाउँपालिकाको वडा नं. ६ कुयलघारीको ३३ घरमा  स्वच्छ सुरक्षित खानेपानीको सुविधा पुगेको छ । गोरखा वेल्फेयर ट्रष्ट र स्थानीयको सहभागितामा खानेपानी आयोजना निर्माण कार्य सम्पन्न भएको हो । उक्त खानेपानी आयोजनाको गाउँपालिका अध्यक्ष दान बहादुर गुरुङले आज एक कार्यक्रमकाबिच उद्घाटन गर्नुभयो ।  

सो अवसरमा गाउँपालिका अध्यक्ष दान बहादुर गुरुङले इच्छाकामनाका नागरिकलाई घरघरमा  स्वच्छ सुरक्षित खानेपानी पु-याउनका लागि गाउँपालिकाले विभिन्न संघसस्थाहरुसँग सहकार्य गरिरहेको बताउनुभयो ।यहाँका स्थानीयका लागि स्वच्छ सुरक्षित खानेपानीका लागि सहयोग गरेकोमा गोरखा वेल्फेयर ट्रष्टलाई धन्यवाद दिनुभयो ।

गोर्खा वेलफेरयका क्षेत्रीय डाइरेक्टर रिटायर्ड मेजर दिलिप गुरुङले उक्त खानेपानी आयोजनाको आजै उपभोक्ता समितिलाई हस्तान्तरण गर्नुभयो । गोर्खा वेल्फेयर ट्रष्ट (GWT) ले २०८२ कार्तिक २० गतेबाट निर्माण चरण सुरु गरी आज खानेपानी आयोजनाको हस्तान्तरण गरिएको हो । 

दुम्सी दुलो मूलको पानीबाट तीन महिनामै सम्पन्न खानेपानी आयोजना बाट ३३ घरमा सुरक्षित खानेपानीको सुविधा पुगेको छ । आयोजनाबाट ९२ जना महिला र ९७ पुरुष गरी १ सय ८९ जना लाभान्वित भएका छन् ।

आयोजनाबाट स्थानीय समुदायलाई सुरक्षित तथा स्वच्छ खानेपानी सेवा उपलब्ध भएपछि सरसफाइ अवस्थाको सुधार भई जनस्वास्थ्यमा सकारात्मक प्रभाव पर्ने अपेक्षा गरिएको गरिएको छ । 

कुल ५६ लाख ९१ हजार ५३१ रुपैयाँ लागतमा निर्माण सम्पन्न भएको खानेपानी आयोजनाको लागि गोर्खा वेल्फेयर ट्रष्टले ४५ लाख ५३ हजार ३१ रुपैयाँ लगानी गरेको छ । उपभोक्ताको तर्फबाट भने ११ लाख ३८ हजार ५ सय रुपैयाँ बराबरको लगानी छ ।

कोयलघारी खानेपानी तथा सरसफाइ आयोजनाका अध्यक्ष काजीलाल गुरुङको अध्यक्षतामा उद्घाटन तथा हस्तान्तरण कार्यक्रम सम्पन्न भएको हो ।