आइसिसी विश्वकप लिग–२ एकदिवसीय सिरिजमा नेपालले आफ्नो १९औँ खेलमा अमेरिकाको सामना गर्दैछ । नेपाल र अमेरिकाबीचको खेल आज बिहान सवा ११ बजेदेखि दुबईस्थित आइसिसी एकेडेमीको मैदानमा सुरु हुनेछ। 

जारी श्रृखंलामा नेपाल पहिलो जितको खोजीमा छ । नेपालले सिरिजको पहिलो र दोस्रो खेलमा क्रमशः अमेरिका र घरेलु यूएईसँग हार बेहोर्‍यो । नेपालले अमेरिकाविरुद्ध १ सय ६ रन र तथा यूएईसँग ५ विकेटको हार बेहोरेको हो ।

नेपाली टिम शनिबारको खेलमा अमेरिकालाई हराएर उत्कृष्ट पुनरागमन गर्ने सोचमा छ । त्यसका लागि नेपालले सानदार अलराउन्ड प्रदर्शन गर्न अनिवार्य छ । यस श्रृंखलामा नेपालले ब्याटिङ, बलिङ र फिल्डिङ तीनवटै विधामा संघर्ष गरिरहेको छ ।

पहिलो खेलमा अमेरिकाले दिएको २ सय ६३ रनको लक्ष्य पछ्याउनेक्रममा नेपाल ३९.१ ओभरमा १ सय ५६ रनमै अलआउट भयो । उक्त खेलमा कुनै पनि नेपाली ब्याटरले अर्धशतकीय इनिङ खेल्न सकेनन् । 

दोस्रो खेलमा यूएईविरुद्ध केही सुधारिएको ब्याटिङ गरे पनि नेपालले पर्याप्त रन बनाउन सकेन । यस खेलमा कप्तान रोहित पौडेलले शतकीय इनिङ खेले । उनले १३० बलमा पाँच चौका र दुई छक्काको मद्दतमा १०९ रनको पारी खेलेका हुन् । ओडिआईमा रोहितको यो दोस्रो शतक हो । योसँगै उनी नेपालका लागि एकदिवसीय अन्तर्राष्ट्रियमा दुई शतकीय इनिङ खेल्ने पहिलो ब्याटर बनेका छन् ।

दोस्रो म्याचमा यूएईविरुद्ध नेपालले बलिङमा राम्रो गर्न सकेन । यस खेलमा नेपालले बलिङतर्फ पावरप्लेमा निकै खराब प्रदर्शन गर्‍यो । नेपालले यूएईविरुद्ध सुरुवाती १० ओभरमा ३३ रन जोडेको थियो । जबकि यूएईका ब्याटरले एकै ओभरमा २२ रन बनाए ।

सोही कारण पनि दोस्रो खेलमा नेपाल सुरुवातदेखि नै दबाबमा पर्यो । नेपाली टिम तेस्रो खेलमा अघिल्लो दुई म्याचमा गरेको गल्तीमा सुधार गर्दै जित निकाल्न पूरा कोसिस गर्नेछ । 

हालसम्म अमेरिका र नेपाल १० वटा ओडिआईमा आमनेसामने भएका छन्, जसमा अमेरिकाले पाँच तथा नेपालले चार खेल जितेको इतिहास छ ।

शनिबार नेपाल अमेरिकाविरुद्ध जित दर्ता गरेर ‘हेड टु हेड’ नतिजा पनि बराबर गर्ने योजनामा छ । यद्यपि त्यो लक्ष्य हासिल गर्न लयमा नरहेको नेपाललाई सहज छैन । पछिल्लो समय ओडिआईमा अमेरिकाविरुद्ध नेपाल कमजोर देखिएको छ ।

अमेरिकासँगको अन्तिम पाँच ओडिआईमध्ये नेपालले एक खेल मात्र जितेको छ । सन् २०२३ यता अमेरिकाविरुद्ध नेपालले जित निकाल्न सकेको छैन । शनिबार नेपाल अमेरिकासँगको हार यात्रामा ब्रेक लगाउँदै लिग–२ मा महत्वपूर्ण दुई अंक जोड्न चाहन्छ ।

नेपाल अहिले १८ खेलबाट १२ अंकसहित तालिकाको सातौं स्थानमा छ । उता अमेरिका भने लिग–२ तालिकाको शीर्ष स्थानमा छ । उसले २२ खेलबाट ३२ अंक जोडेको छ ।

नेपाली टिम अमेरिकाविरुद्ध चुस्त रणनीति र उत्कृष्ट प्लेइङ–११ का साथ मैदान उत्रने तयारीमा छ ।