चितवन । चितवन र नवलपरासीको गैँडाकोट जोड्ने नारायणी नदीमा बनाउने भनिएको ‘सिग्नेचर ब्रिज’को हालसम्म डिजाइन नै तयार हुन सकेको छैन । ४८ महिनामा निर्माण सम्पन्न गर्नेगरी ठेक्का पाएको तुँदी कन्स्ट्रक्सन प्रालिले २७ महिनासम्म डिजाइन नै तयार गर्न नसकेको हो । 

अत्याधुनिक पुल निर्माण हुने भएकाले डिजाइनमा समय लागेको सडक डिभिजन भरतपुरका ई. अर्जुन घिमिरेले बताए । चिनिया प्रोफेसरले नै डिजाइन हेरिरहेको र साउन अन्तिमसम्म डिजाइन बुझाउने कन्ट्रयाक्टरले जानकारी दिएको उनको भनाइ छ । 

पुलको डिजाइन निर्माण कम्पनीले नै गर्ने छ । नयाँ बन्ने सिग्नेचर पुल हाल नारायणीमा सञ्चालन भइरहेको ४२० मिटर लम्बाइकै हुनेछ । पुलको चौडाइ फुटपाथबाहेक साढे सात मिटर र साढे तीन मिटरको हुनेछ । 

बिचमा २१० मिटरको दुरीमा दुइटा मुख्य पिल्लर खडा गरेर आकर्षक सिग्नेचर डिजाइनमा पुल निर्माण गरिने सम्झौतामा उल्लेख छ ।

‘डलब पाइलन केबल स्टेड ब्रिज’ टाइपमा निर्माण हुने उक्त पुलको डिजाइन चीनको टोन्जी विश्वविद्यालयका प्रोफेसर डा. देवेई चेनले रिभ्यू गरिरहेका छन् । अहिले कर्णालीमा निर्माण भएको पुलजस्तै बन्ने यो पुलमा दुई पाइलन अर्थात् दुई ठाउँमा खम्बा हुनेछन् ।

पुलको डिजाइन रिभ्यू भइरहेको र डिजाइन पेस गर्ने अन्तिम स्टेजमा रहेको सडक विभाग पुल महाशाखा प्रमुख तथा उपनिर्देशक ललिजन खनालले लोकान्तरलाई बताए । ‘धेरै नै समय लगाएपछि हामीले जसरी पनि यही साउनभित्रै डिजाइन पेस गर्न निर्देशन दिएका थियौं साउनभित्रै डिजाइन पेस नगरे ठेक्का रद्द गर्ने चेतावनी दिएका थियौं,’ उनले भने, ‘अहिले डिजाइनको रिभ्यू फाइनल स्टेजमा पुगिसकेको छ । सम्भवत: साउन अन्तिमसम्म पेस भएपछि भदौ महिनाभित्रै हामीले डिजाइन पास गरिसक्नुपर्छ ।’ 

नारायणीमा पुल निर्माणका लागि बजेट अभाव नभएकोले काम तीव्र रूपमा अगाडि बढाइने उनको भनाइ छ । भदौभित्र जसरी पनि विभागले पुलको डिजाइन स्वीकृत गरिसक्ने उनले बताए । 

पूर्वपश्चिम राजमार्गमा बन्ने पुलले भरतपुर महानगरपालिका र गैंडाकोट नगरपालिकालाई जोड्नेछ । हाल नारायणी नदीमा रहेको एक मात्र पुल करिब ४४ वर्ष पुरानो भइसकेको छ । २०३८ सालमा नारायणी नदीमा पुल निर्माण गरिएको थियो । ४४ वर्ष पूरानो नारायणी नदीमा रहेको पुल अहिले जीर्ण हुँदै गएको छ ।