इच्छाकामना, ४ जेठ ।  चितवनको प्रसिद्ध पर्यटकीय स्थल जलबिरे लामो झरना आन्तरिक पर्यटकको आकर्षक गन्तब्य हो । जिल्लाको एक मात्र गाउँपालिका इच्छाकामना गाउँपालिका वडा नम्बर ६अन्तर्गत नारायणगढ–मुग्लिन सडकखण्डको मुग्लिनबाट करिब छ किलोमिटर नारायणगढतर्फमा रहेको जलबिरे लामो झरनामा  बाह्रै महिना पर्यटक आउने गर्छन् । 
 तर गर्मी मौसममा भने आन्तरिक पर्यटकहरु घुइँचो नै लाग्ने गर्दछ । यस बर्ष पनि गर्मी मौसम सुरु भएसगैँँ पर्यटकहरुको आगमन बढ्न थालेको जलबिरे लामो झरना पर्यटन विकास  समितिका अध्यक्ष देव कुमार गुरुङले बताउनुभयो । हिजो (शनिबार) मात्र पाँच सय ५० जना पर्यटक आएको टिकट काउन्टरमा रेकर्ड रहेको छ । अन्य दिनमा पनि दुई सयको हाराहारीमा पर्यटकहरु आउने गरेको उहाँले बताउनुभयो । 
उहाँका अनुसार खासगरी शनिवार तथा अन्य सार्वजनिक विदाका दिन यो झरनामा पुग्नेहरुको संख्या अत्यधिक हुने गरेको छ ।
 यहाँ आउने स्वदेशी पर्यटकका लागि रु ५० र विदेशी पर्यटकका लागि रु एक सयको  प्रवेश शुल्क लिने गरिएको छ । गाउँपालिका अध्यक्ष दान बहादुर गुरुङका अनुसार   पर्यटकको टिकट शुल्कबाट बार्षिक रु २५ देखि ३० लाखको हाराहारीमा आम्दानी हुदैँ आएको छ । उहाँका अनुसार गाउँपालिकाको पर्यटकीय स्थल मध्ये सबै भन्दा बढी आम्दानी हुने यही झरना हो । 
एक सय दुई मिटर लामो झरनाले पर्यटकको मन लोभ्याउने गरेको छ । सुन्दर प्राकृतिक मनोरम दृश्य तथा लामो छाँगोबाट झरेको पानीको फोहरा र त्यसबाट आउने शीतल पानीका कण र चिसो हावाको स्पर्शले पर्यटकको मन लोभ्याइदिन्छ ।
साथै यहाँ क्यानोनिङ, , स्विमिङ, स्लाइडिङ, जम्पिङ गर्न देशका विभिन्न जिल्ला र विदेशबाट समेत पर्यटक आउने गरेका छन् । यसैबीच  झरनामा  पर्यटक लोभ्याउनका लागि भौतिक पूर्वाधार निर्माण कार्य भइरहेको छ ।केन्द्र, प्रदेश र स्थानीय सरकारको बजेटमा भौतिक संरचनाहरु निर्माण गरिएको छ । 
दृश्यावलोकनसहितको गोलोघर, सिढीँ बाटो,शैचालय रेलिङ्ग  निर्माण गरिएको छ । झरना सम्म सडक ढलानपिच गरिएको छ । यहाँ पर्यटकलाई थप आकर्षित  बनाउन सौन्दर्यकरणका काम भइरहेको गाउँपालिका अध्यक्ष गुरुङको भनाई छ । गाउँपालिकाले सरसफाई र टिकट काउन्टरका लागि तीन जना कर्मचारी राखेका  छन् । 
 यहाँबढी चितवन,तनहुँ, नवलपुर,मकवानपुर,पर्सा,गोरखा,पोखरा,धादिङ, काठमाडौँलगायतबाट पर्यटक आउने गरेका छन् । विसं २०६९ देखि पर्यटन विकास शुरू भएको हो ।