बाबुराम नेपाली / आँबुखैरेनी
तनहुँकाे आँबुखैरेनी गाउँ पालिका वडा नं. १ स्थित आँधीमुल मन्दिरमा यही बैशाख २६ गते मत्स्य दर्शन द्वादशीको दिन मत्स्य दर्शन पूजाको आयोजना गरिने भएको छ । यही बैशाख २१ गतेका दिन आँधीमुल क्षेत्र संरक्षण समिती र आँधीमुल क्षेत्र संरक्षण सल्लाहकार समितिको संयुक्त बैठकले सो निर्णय गरेको हो ।
गत वर्ष विभिन्न कारणवश आँधीमुलका माछाहरु मरेपछी मानवीय त्रुटीका कारणले पनि माछाहरु हुनसक्ने सम्भावनालाई मध्यनजर गर्दै जेठ ७ गते क्षमा पूजाको आयोजना गरिएको थियो । संयोगवश सो दिन पन्चाङ्ग अनुसार मत्स्य दर्शन द्वादशी परेको थियो । स्थानीय नानीराम अधिकारीले सो मत्स्य दर्शन द्वादशीको दिनलाई एउटा पर्वको रुपमा मनाउने प्रस्ताव पेश गर्नुभएको थियो । उहाँको सो प्रस्तावलाई त्यहाँ उपस्थित भेलाले सर्वसम्मत रुपमा सहमती जनाए अनुरुप यस वर्ष मत्स्य दर्शन पुजाको प्रस्ताव गरिएको आँधीमुल क्षेत्र संरक्षण सल्लाहकार समिति सदस्य रामचन्द्र पण्डितले जानकारी गराउनुभयो । उहाँका अनुसार सो दिन बिधिपुर्वक चण्डी पाठ गरि बोकाको बलि अर्पण गरेर पुजा गरिनेछ ।
अँधीमुल क्षेत्र संरक्षण समितिका अध्यक्ष हिमाल थापाले सो दिन यस क्षेत्रका सम्पुर्ण भक्तजनहरुलाई फूल अक्षता लिएर सहभागी हुन आह्वान गर्नुभएको छ । उहाँले माछालाई नै आँधीमुल मन्दिरको जिवित देवताको रुपमा पुजा गरिने भएकोले मत्स्य दर्शन द्वादशीलाई यहाँको एउटा प्रमुख पर्वकै रुपमा विकसित गरिने जानकारी गराउनु भयो ।
सो संयुक्त बैठकले सत्रसय बाट आँधीमुल जाने चोकमा प्रवेश द्वार बनाउने निर्णय पनि गरेको छ ।
.png)
