संयुक्त राज्य अमेरिकामा निर्यात गरिने सामानहरूमा लगाइएका कठोर भन्सार शुल्कहरू कम गर्नका लागि ५० भन्दा बढी देशले राष्ट्रपति डोनाल्ड ट्रम्पसँग वार्ता खोजेको ह्वाइट हाउसले बताएको छ ।

बजार सुस्त हुँदै जाँदा पनि आफ्ना नीतिहरू ‘कहिल्यै परिवर्तन हुने छैनन्’ भनी जोड दिँदै बुधबार विश्वभरका स्तब्ध देशहरूमा भन्सार शुल्कको झट्का जारी गरेदेखि रिपब्लिकन ट्रम्प अडिग रहनुभएको छ ।

तर उहाँको तहगत समयसीमाले केही देशलाई वार्ता गर्ने ठाउँ दिएको छ । यद्यपि उहाँले आफू दृढ रहने बताउनुभएको छ र उहाँको प्रशासनले कुनै पनि प्रतिशोध विरुद्ध चेतावनी दिइरहेको छ ।

“५० भन्दा बढी देशले वार्ता सुरु गर्न राष्ट्रपतिसँग सम्पर्क गरेका छन्”, ह्वाइट हाउस राष्ट्रिय आर्थिक परिषद्का प्रमुख केभिन ह्यासेटले अमेरिकी व्यापार प्रतिनिधिलाई उद्धृत गर्दै आइतबार सिएनएनलाई भन्नुभयो ।

उहाँका अनुसार ती देशले त्यसो गरिरहेका थिए किनभने उनीहरूले बुझ्दछन् कि उनीहरूले धेरै भन्सार शुल्क वहन गर्छन् । यद्यपि प्रशासनले संयुक्त राज्यमा भन्सार शुल्कले ठूलो मूल्य वृद्धि गर्दैन भन्ने कुरामा जोड दिइरहेको छ ।

“मलाई लाग्दैन कि तपाईंले अमेरिकी उपभोक्तामा ठूलो प्रभाव देख्नुहुनेछ”, उहाँले भन्नुभयो ।

अर्थमन्त्री स्कट बेसेन्टले पनि ५० वटा देशले सम्पर्क गरेको एनबिसीको मिट द प्रेसलाई बताउनुभयो ।

“मलाई लाग्छ कि यो राष्ट्रपति ट्रम्पको निर्णय हो”, ट्रम्पले उनीहरूसँग वार्ता गर्नुहुन्छ कि भन्ने प्रश्नमा बेसेन्टले भन्नुभयो, “यस क्षणमा उहाँले आफ्नो लागि अधिकतम प्रभाव सिर्जना गर्नुभएको छ… मेरो विचारमा हामीले देशहरूले के प्रस्ताव गर्छन् र त्यो विश्वसनीय छ कि छैन हेर्नुपर्नेछ ।”

उहाँले दाबी गर्दै भन्नुभयो, “अन्य देशले लामो समयदेखि खराब व्यवहार गरिरहेका छन् र यो त्यस्तो कुरा होइन जुन दिन वा हप्ताहरूमा वार्ता गरेर टार्न सकिन्छ ।”

संयुक्त राज्य अमेरिकामा उत्पादनहरू बेच्ने विश्वभरका देशहरूले वास्तवमा अमेरिकीहरूलाई ठगिरहेका छन् भनेर ट्रम्पले लामो समयदेखि जोड दिनुभएको छ र उहाँले त्यो गलतलाई सुधार्ने माध्यमका रूपमा भन्सार शुल्कलाई हेर्नुभएको छ ।

तर धेरै अर्थशास्त्रीले भन्सार शुल्कहरू उपभोक्ताहरूमा सरिन्छन् र उनीहरूले घरमा मूल्य वृद्धि देख्न सक्छन् भन्दै चेतावनी दिएका छन् । यसैबीच व्यापार र उत्पादनसम्बन्धी अनिश्चितताले विश्व बजारहरूमा दिनहुँको आतङ्कलाई बढावा दिन मद्दत गरेको छ ।