चितवन, फागुन ४ । चितवनका किसानले अण्डामा लेभलिङ गर्न थालेका छन् । आफुले उत्पादन गरेका अण्डाको गुणस्तरबारे जानकारी दिनका लागि यहाँका किसानले अण्डाको क्रेटमा लेभलिङ राख्न थालेका हुन् । खुल्ला पालिका र केजमा पालिएका कुखुराले दिने अण्डाको गुणस्तर फरक हुने भएकाले उपभोक्तालाई जानकारी गराउन अण्डामा लेभलिङ गर्न थालिएको अण्डा उत्पादक किसान दिपक पाण्डेले जानकारी दिए ।

पाण्डेले खुल्ला खोरमा (फ्रि केज) कुखुरा पालन गर्दै आएका छन् । अहिले काठमाडौँ जाने अण्डामा लेभलिङ गरिएको उनले बताए । ‘हप्तामा एक गाडी (१६० बाक्सा) अण्डामा लेभलिङ राखेर काठमाडौँ पठाउँछु । व्यवसायीबाट राम्रो प्रतिक्रिया आएको छ’, उनले भने ‘चितवनमा बिक्री हुने अण्डामा पनि लेभलिङ राख्ने योजनामा छ ।’ उनले १२ हजार लेयर्स कुखुरा पालेका छन् ।

उनका अनुसार, ब्याट्रीकेजमा पालिका कुखुराबाट उत्पादित अण्डामाभन्दा दुई तिहाई बढी भिटामिन ए, तीन गुणा बढी भिटामिन ई, सात गुणा बढी बिटा क्यारोटीन, दोब्बर बढी ओमेगा, छ गुणा बढी भिटामिन डी लगायतका पौष्टिक तत्व पाइन्छ । मानिसको आँखाका लागि चाहिने एन्टिअक्सिडेन्ट, लुटेन र जेक्साथिन समेत केज फ्रि अण्डाको पहेँलो भागमा बढी पाईएको उनले बताए ।

एनिमल नेपालका अनुसार चितवनमा अण्डा उत्पादक किसान सय जनाको हाराहारीमा छन् । त्यसमध्ये १० जना किसानले केजमा कुखुरा पाल्दै आएका छन् । बाँकी किसानले फ्रि केजमा पालन गर्दै आएका छन् । फ्रि केजबाट उत्पादित अण्डाको गुणस्तरबारे जानकारी गराउन सके साना किसान र उपभोक्तालाई समेत फाइदा पुग्ने एनिमल नेपालकी प्रमुख सुलक्षणा राणा बताउँछिन् । भुई खोस्रने र पखेँडा चलाउने कुखुराको नेचर भएकाले साँघुरो खोरमा पाल्न नहुने उनले बताइन् । खुल्ला छाडेर पालिका कुखुराले अण्डा समेत धेरै दिने उनको भनाई छ ।