कुरिनटार ।  प्रगति पाठशाला कुरिनटारले आफ्नो १९ औँ बार्षिकोत्सव तथा अभिभावक दिवस मनाइएको छ । बागमती प्रदेशका बन तथा वातावरणमन्त्री कृष्णप्रसाद सिलवालको प्रमुख आतिथ्यतामा एक समारोहकाबिच बार्षिकोत्सव तथा अभिभावक दिवस मनाइएको हो।

कार्यक्रममा गाउँपालिका उपाध्यक्ष माया सिलवाल, प्रमुख प्रशासकिय अधिकृत चन्द्रकान्त बस्नेतको विशिष्ट तथा वडा नम्बर ४ का वडाध्यक्ष रुद्रप्रसाद उप्रेती, वडा नम्बर ३ का वडाध्यक्ष नरबहादुर नेपाल,पूर्व शिक्षक तथा साहित्यकार कृष्णप्रसाद पोखरेल,इलाका प्रहरी कार्यालय मुग्लिनकी प्रमुख  निरला भण्डारी लगायतको आतिथ्यता रहेको थियो । 

कार्यक्रमका प्रमुख अतिथि  वनमन्त्री सिलवालले  संस्थागत विद्यालय स्थापनाको उद्देश्य सार्वजनिक विद्यालयसँग प्रतिष्पर्धा  गरेर गुणस्तरीय शिक्षा प्रदान गर्नका निम्ति भएको बताउनुभयो । अब संस्थागत विद्यालयले सार्वजनिक विद्यालयसँग नजिक रहेर सिक्ने र सिकाउने कार्य गर्नुपर्ने बताउनुभयो । यस प्रगति पाठशालाले धेरै  डाक्टर, इन्जिनियरहरू जन्माइसकेको उल्लेख गर्दै विद्यालयको उज्ज्वल भविष्यको कामना गर्नुभयो ।

कार्यक्रममा विद्यालयका प्रिन्सिपल टंक त्रिपाठीले विद्यालयको बार्षिक प्रगति प्रतिवेदन प्रस्तुत गर्नुभएको थियो । एसइई तथा आधारभूत परिक्षामा उत्कृष्ट नतिजा हासिल गर्ने विद्यार्थीहरुलाई नगदसहित पुरस्कृत गरेका थिए  । साथै उत्कृष्ट नतिजा  ल्याउने विषयगत शिक्षकहरुलाई पनि नगदसहित पुरस्कृत तथा सम्मान गरिएको विद्यालयले जनाएको छ । 

कार्यक्रममा विद्यार्थी,शिक्षक र अभिभावकहरुले विभिन्न सांस्कृतिक प्रस्तुति  तथा प्रगति स्काउट ट्रुपले पिटी तथा पिरामिट प्रदर्शन गरेका थिए । साथै कार्यक्रममा साहित्यकार कृष्णप्रसाद पोखरेलले कविता र अभिभावक महेन्द्र डल्लाकोटीले बाल गीत प्रस्तुत गर्नुभएको थियो । 

सहायक प्रिन्सिपल ईश्वरविलास अधिकारीले स्वागत मन्तव्य राख्नुभएको थियो भने शिक्षक सुदर्शन कट्टेलले  कार्यक्रम सञ्चालन गर्नुभएको थियो ।विद्यालय संचालक समितिका अध्यक्ष ध्रुब त्रिपाठीको सभापतित्वमा कार्यक्रम सम्पन्न भएको हो ।