हपनी । नेपाल चेपाङ संघ केन्द्रीय कार्यकारिणी समितिले जुगेडी संघर्षका सहिद परिवारलाई सम्मान गरेको छ । बिहिबार परेको सहिद दिवसको अवसर पारेर इच्छाकामना २ स्थित हपनीमा एक कार्यक्रमको आयोजना गरि जुगेडी संघर्षमा परि चेपाङ समुदायबाट पहिलो सहिद हुने सन्त बहादुर चेपाङ र  दशरथ चेपाङका परिवारलाई सम्मान गरेको हो ।  

संघले हपनीमा नै पुगेर  सहिद  दशरथ चेपाङको जेठो छोरा किष्ट बहादुर चेपाङ र माइलो छोरा सुक्र  बहादुर चेपाङ र अर्का सहिद  सन्त बहादुर चेपाङका  छोरा वकिल चेपाङलाई  एक कार्यक्रमका बिच दोसल्ला ओढाएर र सम्मानपत्र सहित सम्मान गरिएको नेपाल चेपाङ सङ्घका केन्द्रिय अध्यक्ष गोविन्दराम चेपाङले जानकारी दिनुभयो । 

बागमती प्रदेशका वन तथा वातावरणमन्त्री कृष्णप्रसाद सिलवाल, गाउँपालिका अध्यक्ष दान बहादुर गुरुङ, वडाध्यक्ष पञ्च बहादुर चेपाङ लगायत चेपाङ समुदायका अगुवाहरुको उपस्थितिमा सम्मान गरिएको उहाँले  बताउनुभयो ।  

राजपत्रमा उल्लेख भएअनुसार सन्तबहादुर र दशरथको साहदत  वि.स. २०३४ साल असार ७ गते भएको हो  । पञ्चायतकाल विरुद्ध चितवनको  जुगेडीमा भएको संघर्षमा सामेल हुँदा उहाँहरु सहिद हुनुभएको थियो । लोकतान्त्रिक गणतन्त्र घोषणा पश्चात  दुबै जनालाई  सहिद घोषणा गर्ने निर्णय सरकारले २०६५ सालको पुस ९ मा गरेको राजपत्रमा विवरण छ । 

दशरथ चेपाङ र सन्त बहादुर चेपाङलाई सहिद घोषणा गरेपनि राज्यले उहाँहरुको परिवारको शिक्षा स्वास्थ्य लगायत पालनपोषणमा  सहयोग नगरेको बताउनुभयो । सहिद परिवारहरुको आर्थिक अवस्था कमजोर भएकाले राज्यले तत्काल सहयोग गर्न आवश्यक रहेको उहाँको भनाई छ ।  साथै  चेपाङ सहिदको सम्मानका लागि  फिस्लिङ– शक्तिखोर सडकलाई चेपाङ सहिद मार्ग राख्नुपर्ने चेपाङ संको माग रहेको पनि उहाँले बताउनुभयो । 

सो अवसरमा वागमती प्रदेशका वन तथा वातावरणमन्त्री कृष्णप्रसाद सिलवालले सहिदको परिवारका लागि प्रदेश सरकारले सहयोग गर्ने प्रतिवद्धता जनाउनुभयो । साथै गाउँपालिका अध्यक्ष दान बहादुर गुरुङले पनि गाउँपालिकाले आवश्यक सहयोग गर्ने प्रविद्धता जनाउनुभएको थियो ।