गणतन्त्रको प्रणालीलाई अझ जीवन्त बनाउनुपर्ने प्रधानमन्त्री ओलीको टिप्पणी

इच्छाकामना न्युज

७, फाल्गुण २०७७

गणतन्त्रको प्रणालीलाई अझ जीवन्त बनाउनुपर्ने प्रधानमन्त्री ओलीको टिप्पणी

काठमाण्डौ, ७ फागुन । प्रधानमन्त्री केपी शर्मा ओलीले सङ्घीय लोकतान्त्रिक गणतन्त्रको प्रणालीलाई अझ जीवन्त बनाएर अगाडि बढ्नुको विकल्प नरहेको बताउनुभएको छ ।
७१ औँ राष्ट्रिय प्रजातन्त्र दिवसको अवसरमा सैनिक मञ्च टुँडिखेलमा आज आयोजित विशेष समारोहलाई सम्बोधन गर्दै प्रधानमन्त्री ओलीले प्राप्त उपलब्धीको रक्षा गर्दै थप उपलब्धिका लागि अगाडि बढ्नुपर्नेबेला भएकोमा जोड दिनुभयो । ‘समृद्ध नेपाल र सुखी नेपाली’ को राष्ट्रिय आकांक्षा पूरा गर्न सरकार लागिपरेको उल्लेख गर्दै प्रधानमन्त्री ओलीले लोकतन्त्रभित्रबाटै अस्थिरता खोज्ने प्रयास भइरहेको र यसलाई निस्तेज गर्नुपर्नेछ भन्नुभयो । मुलुक नयाँ निर्वाचन तर्फ अग्रसर भएकाले सबै निकायले आआफ्नो भूमिका जिम्मेवारीपूर्वक वहन गर्नुपर्ने बेला आएको उहाँले बताउनुभयो ।
ताजा जनादेश लोकतान्त्रिक उच्चतम विधिभएको बताउनुहुँदै प्रधानमन्त्री ओलीले त्यसकालागि जुट्न सबैमा आव्हान गर्नुभयो । सुशासन र विकासका सपनाहरु साकार पार्ने बेलामा कुनै अलमल गर्नुपर्ने आवश्यक नरहेको बताउनुभयो । मतभेदलाई बढावा दिने कुनै पनि गतिविधि गर्नु वान्छनीय नभएको चर्चा गर्र्नुहुँदै प्रधानमन्त्री ओलीले बृहत्तर राष्ट्रिय हितका लागि अघि बढ्नुको विकल्प नरहेको बताउनुभयो । विगत सात दशकसम्म मुलुकको राष्ट्रियता, सामाजिक न्याय तथा समानताका लागि योगदान गर्ने सबैप्रति प्रधानमन्त्री ओलीले धन्यवाद व्यक्त गर्नुभयो ।