आज प्रथम शहिद लखन थापा १४५ औं स्मृति दिवसः शहिद लखन गाउँपालिकाले दियो सार्वजनिक विदा

इच्छाकामना न्युज

२, फाल्गुण २०७७

आज प्रथम शहिद लखन थापा १४५ औं स्मृति दिवसः शहिद लखन गाउँपालिकाले दियो सार्वजनिक विदा

घैरुङ, २ फागुन । जहानियाँ राणशासनको विरुद्ध नागरिकलाई संगठित गरि समानान्तर सरकार बनाएर चुनौति दिने प्रथम शहिद लखन थापा मगर र उनका सहयोगी जैसिंङ चुमी मगरको १४५ औं स्मति दिवस आज। यहि अवसरमा गोरखाको शहिद लखन गाउँपालिकाले गाउँपालिकाभर सार्वजनिक विदा दिएको छ।
यस्तै गाउँपालिकाले सोहि अवसरमा आज विविद्य कार्यक्रम गरि प्रथम शहिद लखन थापा मगर र उनका सहयोगी जैसिंङ चुमी मगरको १४५ औं स्मति दिवस मनाउने तयारी गरेको गाउँपालिकाका प्रमुख प्रशासकिय अधिकृत जीवन आले मगरले जानकारी दिएको छ। शहीद लखन थापा जन्मेको तथा शदाहत प्राप्त गरेको स्थल शहीदलखन गाउँपालिका ७ काउले भँगारमा स्मृति दिवस समारोह गर्न लागिएको आलेले बताए।
सोही औपचारिक समारोहका बीच गाउँपालिकाका नौवटा वडाका बालीतर्फका र पशुपालनतर्फका एक/एक जना गरी १८ जना उत्कृष्ट किसानलाई सम्मान गर्ने कार्यक्रम रहेको छ । त्यस्तै तिनै १८ जनामध्य बालीतर्फका र पशुपालनतर्फका सर्वोत्कृष्ट एक/एक जना कृषकलाई पनि पालिकास्तरको सर्वोत्कृष्ट कृषक घोषणा गरी पुरस्कृत गर्ने कार्यक्रम रहेको उनले जानकारी दिए।
साथै सोही अवसरमा प्रथम शहीद लखन थापाका सहयोद्धा तथा विभिन्न कालखण्डमा शहादत पाएका तथा बेपत्ता पारिएकाहरु गरी १२ जनाको परिबारलाई सम्मान गर्ने कार्यक्रम रहेको पालिकाले जनाएको छ।