पवित्रा पराजुली, नवलपरासी, १० माघ । स्थानीय सरकार आएपछि दुरदराजका नागरिकले सेवा सुविधा र विकास पाउने अपेक्षा गरिएको थियो । तर नवलपरासीको गैंडाकोट नगरपालिका वडा नम्बर ६ का ३५ घर बोटे समूदायका मानिसहरुले स्थानीय सरकारबाट कुनै सुविधा नपाएको गुनासो गरेका छन् ।
मनमाउत्साह त छ, तर हातमा सीप नभएकै कारण, गैंडाकोट ६ बोटेटोलका स्थानीय हात बाँधेर बस्न बाध्य छन् । त्यही हातले भोट हालेर जिताएका जनप्रतिनिधीले सीप सिकाउलान् र काम पाईएला भन्ने अपेक्षा थियो । तर उनिहरुको अपेक्षा हालसम्म पूरा नभएको स्थानीय उमा वि.क.ले गुनासो गर्नुभयो । 
चुनावको समयमा बोटे समुदायका लागि सीप मूलक कार्यक्रम ल्याउने र रोजगारीको अवसर सिर्जना गर्ने जनप्रतिनिधीले बताएका थिए । तर जितेर गएकाहरु तीनवर्ष भयो, फेरी फर्किएर आएका छैनन् । बोटे समूदायका मानिसको दुखका दिन पनि फेरिएका छैनन् । मजदुरी गरेर छाक टार्नै मुस्किल परेको बताउनुहुन्छ, स्थानीयधनबहादुर बोटे ।  
नारायणी नदीकिनारमा बोटे समूदायको घर छ । तर अधिंकाश घर घामपानी छेक्ने खालका छैनन् । न रोजगारी छ, न प्रशस्त जग्गा । समिला बोटे आर्यजनका कार्यक्रम माग गर्न वडामा कति जानु भयो कति, तर उहाँको कुरा कहिलै सुनुवाई भएन । नगरपालिकाले विकाससँगै सीपमूलक तालिमहरु पनि नचलाएको होईन । तर बोटे समूदायको बस्ती जहिलै बत्तीमुनीको अँध्यारोमा पर्दै आएको छ । 
अब त्यस्तो हुन नदिने बताउनुहुन्छ, गैँडाकोट नगरपालिका वडा नम्बर ६ का वडाध्यक्ष लक्ष्मीप्रसाद सापकोटा ।  बोटे समूदायका मानिसहरुले स्थानीय सरकारबाट अनावश्यक सेवा सुविधा भन्दा पनि सीप र रोजगारी खोजेका छन् । तर राज्यले आफ्नो दायित्व पूरा गरेको छैन ।