कुरिनटार । गोरखाको शहिद लखन गाउँपालिका ४ स्थित ठेउटार गाउँ नजिकै रहेको त्रिशुली नदी किनारबाट नदीजन्य सामाग्री निकालेर लैजान पुनः त्रिशूली नदीमा बाध राख्न थालिएको छ । केहि दिन अघि पनि अहिले बाध बनाईरहेको स्थान भन्दा केहि माथि बाध बनाउन लाग्दा इच्छाकामना गाउँपालिका ४ स्थित कुरिनटारवासीले विरोध गरेको थियो । त्यसपछि उक्त ठाउँबाट पछि हटेको ठेकेदार कम्पनी त्रियुगा निर्माण सेवा सिन्धापाल्चोकले पुनः इच्छाकामना गाउँपालिका ४ स्थित लेवाटार बाध बनाउन लागेको हो ।

स्थानीयको विरोधका बाबजुत पनि ठेकेदार कम्पनीले बाध बनाउन नरोकेपछि आज बिहान स्थानीयबासी र हिमालयन रिभरगाइड एसोसियसन (हर्गान)ले उक्त कार्य तत्काल रोक्न माग गर्दै नदीमै पुगेका थिए । राफ्टिङका लागि उत्कृष्ट मानिने चितवनको इच्छाकामना अन्तरगत त्रिशूली नदीमा नदीजन्य पदार्थ ओसारपसार गर्न बाँध राखेपछि हिमालयन रिभरगाइड एसोसियसन (हर्गान) र स्थानियले तत्काल उक्त कार्य रोक्न माग गरेका हुन् ।

शहिद लखन गाउँपालिका ४ र इच्छाकामना गाउँपालिका ४ स्थित ठेवाटारमा बाँध बाँध्ने काम तत्काल बन्द गराई नदीलाई यथास्थानमा बग्न दिन माग गर्दै उनिहरुले आजै इच्छाकामना गाउँपालिकालाई ज्ञापन पत्र बुझाएको छ । त्रिशूली नदीमा बाँध बाँध्ने र जथाभावी नदीजन्य पदार्थ उत्खनन् गर्दा राफ्टिङ व्यवासय संकटमा परेका छन् ।

नदी बहाव परिवर्तन गर्न नपाइने पर्यटन व्यवासयी मेघ आलेले बताए । नदीजन्य पदार्थ उत्खनन् गर्दा यस नदीको सुन्दरता विग्रने र नदी आसपासमा रहेका होटल रिर्सोट र बस्तीहरु जेखिममा परेकोे उनको भनाई छ । पानीको बहाव नैे लर्काउदाँ यसै पनि संकटमा परेको राफ्टिङ व्यवसाय झन संकटमा पर्ने पर्यटन व्यवसायी आलेले बताए ।

यसैबिच इच्छाकामना गाउँपालिकाले पनि यस क्षेत्रको वातावरणीय सन्तुलन, नदीको बहाव संचालित पेशा व्यवसाय जस्ता विषयहरुमा प्रतिकुल प्रभाव पर्ने कुनै पनि कार्य नगर्न नगराउन शहिद लखन गाउँपालिकालाई अनुरोध गरेको छ । स्थानिय र हर्गानले गाउँपालिकामा ज्ञापन पत्र बुझाए पश्चात इच्छाकामना गाउँपालिकाले पत्र मार्फत उक्त कार्य रोक्न अनुरोध गरेको हो ।

यसैबिच गोरखाको शहिद लखन गाउँपालिका वडा नम्बर ४ ठेवाटारका स्थानियहरुले समेत नदीजन्य पदार्थ उत्खनन् बन्द गर्न माग गरेका छन् । बस्तीनै जोखिमा पर्ने भएकाले उनीहरुले सो कार्य बन्द गर्न माग गरेका हुन् ।