कुरिनटार । इच्छाकामना ब्रोडकास्टिङ मिडिया प्रालिद्वारा सञ्चालित इच्छाकामना न्यूज डटकम डिजिटल अनलाईन पत्रिकाले पाँचौ वार्षिकोत्सव मनाएको छ । शनिबार चितवनको इच्छाकामना ३ चुम्लिङटार स्थित सिद्धार्थ रिसोर्टमा भव्य कार्यक्रमको आयोजना गरि वार्षिकोत्सव मनाएको हो।

चितवनको एकमात्र गाउँपालिका इच्छाकामनालाई मुख्य केन्द्र मानी आसपासका स्थानीय तहहरुको विभिन्न गतिविधिलाई समावेश गर्दै समाचार प्रकाशन प्रसारण गर्दै आईरहेको अनलाईन २०७४ कार्तिक ३० गतेदेखि विधिवत संचालनमा आएको थियो । यसै क्रममा यहि कार्तिक ३० गतेदेखि अनलाईन निरन्तर संचालन भएको ५ वर्ष पूरा भै छैटौं वर्षमा प्रवेश गरेको हो। 

वार्षिकोत्सवको अवसरमा आयोजित कार्यक्रममा विभिन्न व्यक्तित्वहरुलाई सम्मानित समेत गरिएको थियो । कार्यक्रममा सम्मानित हुने व्यक्तित्वहरुमा नवौँ राष्ट्रिय खेलकुदमा स्वर्णपदक जितेकी इच्छाकामना ५ मुग्लिनकी तेक्वान्दो खेलाडी सुप्रिका गुरुङ, वरिष्ठ पत्रकार इच्छाकामना संचारकर्मी समूहका अध्यक्ष रोहिणीप्रसाद त्रिपाठी, गोरखाका पत्रकार कान्तिपुरकर्र्मी भीमलाल श्रेष्ठ, आँबुखैरेनीका साहित्यकार अनिल श्रेष्ठ, शहिद लखन गोरखाका लेखक शोधकर्ता एंव प्रशासक जीवन आलेमगर, चेपाङ समुदायबाटै पहिलो सिभिल इन्जिनियर प्रथम श्रेणीमा उत्तिर्ण गर्न सफल धादिङको बेनीघाट रोराङका मनिष चेपाङ रहेका छन्।

यस्तै कार्यक्रममा प्रमुख अतिथि चितवन क्षेत्र नम्बर २ ‘क’ का प्रदेशसभा सदस्य कृष्ण सिलवालले  विकास र समृद्धि नामक स्मारिका समेत विमोचन गरिएको थियो भने प्राध्यापक एवं समालोचक तेजविलास अधिकारीले स्मारिकाको विषयमा बोलेका थिए। 

इच्छाकामना न्युज डटकमका सम्पादक देवराज गुरुङका सभापतित्व तथा चितवन क्षेत्र नम्बर २ ‘क’ का प्रदेशसभा सदस्य कृष्ण सिलवालको प्रमुख आतिथ्यता सम्पन्न कार्यक्रममा इच्छाकामना गाउँपालिका अध्यक्ष दान बहादुर गुरुङ, गण्डकी गाउँपालिकाका अध्यक्ष दीपक तिमल्सिना साकार, सहिद लखन गाउँपालिका अध्यक्ष रमेशबाबु थापा मगर, आबुँखैरेनी गाउँपालिकाका अध्यक्ष शुक्र चुमान विशिष्ट अतिथि रहेका थिए।

कार्यक्रममा अनलाईनका संचालक एवं कार्यकारी सम्पादक चित्र बहादुर गुरुङ सोल्टिले स्वागत मन्तव्य व्यक्त गर्दै अनलाईनको स्थापना, संचालनका बारे बताएका थिए भने युवराज लामाले कार्यक्रम संचालन गरेका थिए।

चितवनको इच्छाकामना गाउँपालिका र आसपासका जिल्लाका पालिकाहरुको गतिविधीसहित समाचारहरु पस्किदै आएको इच्छाकामना न्युज डटकम इच्छाकामनाको पहिलो डिजिटल अनलाईन पत्रिका हो ।