७० हजारभन्दा बढी गैरसरकारी संस्थामा अनुगमनको आवश्यकता

इच्छाकामना न्युज

२०, मंसिर २०७९

७० हजारभन्दा बढी गैरसरकारी संस्थामा अनुगमनको आवश्यकता

उषा तामाङ, काठमाडौँ । देशभर दर्ता भएका ७० हजारभन्दा बढी गैरसरकारी संस्थाको गतिविधि अनुगमन प्रभावकारी हुन सकेको छैन । देशभरका गैरसरकारी सङ्घ संस्थामध्ये धेरैजसोको कार्यक्षेत्र सीमान्तकृत र पिछडिएका समुदाय नै हुने गरेको छ । स्थान वा क्षेत्र अनुसार गैरसरकारी संस्थाले त्यस्ता समुदायलाई लक्षित गर्दै जीविकोपार्जन, सीप विकास, खानेपानी, स्वास्थ्य, शिक्षा, जीविकोपार्जन, मानव बेखबिखन लगायतका क्षेत्रमा काम गर्दै आएका छन् । तर, उनीहरूको गतिविधि अनुगमन प्रभावकारी हुन सकेको छैन ।

समाज कल्याण परिषद्का अनुसार देशभर ७० हजारभन्दा बढी गैरसरकारी सङ्घ, संस्था दर्ता छन् । यी संस्थाले वर्षौँदेखि समुदायस्तरमा काम गरिरहेका छन् । तर अपेक्षा अनुसारको काम नभएको भनेर आलोचना हुने गरे पनि सरकारले प्रभावकारी नियमन र अनुगमन गर्न सकेको छैन । समाज कल्याण परिषद्का प्रवक्ता सञ्जयकुमार मल्लिकले सम्झौता अनुसार समय समयमा अनुगमन भइरहेको दाबी गर्नुभयो ।

देशभर कति गैरसरकारी संस्थाले कुन क्षेत्रमा कति बजेट खर्च गरिरहेका छन् भन्ने यकिन विवरण सरकारसँग छैन । अर्कोतिर, सामाजिक, साँस्कृतिक रुपमा पिछडिएको वर्ग भनेर उल्लेख भए पनि स्पष्ट परिभाषा नहुँदा एकातिर संस्थाहरूलाई काम गर्न र अर्काेतिर संस्थालाई नियमन गर्न समस्या भइरहेको छ ।