काठमाण्डौ । ४ मंसिरमा हुने प्रतिनिधिसभा तथा प्रदेशसभा सदस्य निर्वाचनका लागि बिहीबार मध्यरातिबाट मौन अवधि सुरु भइसकेको छ । अब ४ मंसिर अर्थात् आइतबार मतदान नसकुन्जेलसम्म मौन अवधि कायम रहन्छ, यो समयमा उम्मेदवारको प्रचारप्रचार लगायतका क्रियाकलाप गर्न कानुनी दण्डनीय मानिन्छ ।

भनिन्छ चुनावमा जितहारको लेखाजोखा नै मौन अवधिमा हुन्छ । र, राजनीतिक दल, उम्मेदवारले सकेजति यही मौन अवधिमा गर्छन् । अर्थात् मतदाता तान्न कुनै कसरत बाँकी राख्दैनन् ।

यस्तै, घटना काठमाडौं ५ मा भएको छ । मतदातालाई प्रभावित पार्न पैसा बाँडेको आरोप लागेपछि काठमाडौं ५ ९ख० मा एमाले उम्मेदवार दीपक निरौलालाई प्रहरीले शुक्रबार राति पक्राउ गरेको छ । बुढानीलकण्ठ नगरपालिका९६ स्थित एक घरमा प्रवेश गरेका निरौलालाई पैसा बाँड्न लागेको भन्दै स्थानीयले घेरा हालेका थिए । उनीसँगै एमाले बुढानीलकण्ठ नगर अध्यक्ष प्रदीप डंगोल र ६ नम्बर वडाका अध्यक्ष रवि खड्का पनि प्रहरी नियन्त्रणमा छन् ।

प्रहरी प्रवक्ता डीआईजी टेकप्रसाद राईले पैसा बाँडेको आरोप लागेका बेला प्रहरीले उद्धार गरेको बताए । पैसा बरामद नभएपनि प्रहरीले यसबारे अनुसन्धान गरिरहेको छ ।

निरौलाले आफू क्यान्सरका बिरामीलाई भेट्न गएको बेला पछ्याउँदै आएका केही व्यक्तिले निराधार आरोप लगाएको भन्दै प्रमाण ल्याउन चुनौती दिएका छन् । जिल्ला निर्वाचन अनुगमन समितिले छानबिन गर्ने भएको छ ।

निर्वाचन प्रभावित हुनेगरी नगद वा जिन्सी दिन वा लिन नपाइने कानुनी व्यवस्था छ । नगद बाँडेको पुष्टि भए निर्वाचन कसुर ऐन २०७३ अनुसार कारबाही हुने छ । ५० हजार रुपैयाँसम्म जरिवाना वा एक वर्षसम्म कैद वा दुवै सजाय हुने व्यवस्था छ ।

महोत्तरीमा पैसासहित उम्मेदवार पक्राउ परेका छन् । महोत्तरीको बर्दिवास ११ स्थित खयरमाराको पाँचे टोलबाट स्वतन्त्र उम्मेदवार विष्णुबहादुर योन्जन चडेको गाडीबाट प्रहरीले डेढ लाख नगद बरामद गरेको हो ।महोत्तरी १ ९ख० का स्वतन्त्र उम्मेदवार योन्जनले आचारसंहिताविपरीत मतदातालाई प्रलोभनमा पार्ने हिसाबले पैसा बोकेर हिँडेको पाइएको हो ।

महोत्तरीका प्रहरी प्रमुख एसपी कृष्ण पंगेनीका अनुसार बा १४ च ८८७४ नम्बरको स्कर्पियोमा अन्य व्यक्तिहरुलाई लिएर हिँडेका योन्जनसहितका व्यक्तिलाई नियन्त्रणमा लिइएको हो । तर, निर्वाचन अधिकृतको कार्यालयले शनिबार स्पष्टीकरण सोध्ने गरी छाडेको छ । योन्जनले मतदातालाई प्रलोभनमा पार्ने हिसावले पैसा बोकेर हिँडेको पुष्टि भएमा २५ हजार जरिवाना हुनेछ ।

गण्डकीमा अर्थमन्त्री लखेटिए

गण्डकी प्रदेशका अर्थमन्त्री रामजीप्रसाद बराल लखेटिएका छन् । गठबन्धनबाट कास्की ३ का प्रतिनिधिसभा उम्मेदवार बनेका माओवादी नेता बरालले शुक्रबार साँझ साढे पाँच बजे अन्नपूर्ण गाउँपालिका–१ भीर मुनिबाट एमाले कार्यकर्ताले लेखटेका हुन् ।

मौन अवधिमा चुनावी प्रचार गर्न नपाइने भए पनि बराल, पूर्व सांसद एवं माओवादी नेतृ दुर्गा विकलगायत माओवादी कार्यकर्ता त्यहाँ पुगेका थिए ।एमाले अन्नपूर्ण गाउँ कमिटी अध्यक्ष विवेक देवकोटाले घरदैलो र मतदाता प्रलोभन गर्न आएकाले आफूहरूले प्रहरीलाई बुझाएको बताए।

डडेल्धुरामा प्रधानमन्त्री देउवाकै अगाडि मौन अवधिको धज्जी उडाइयो डडेल्धुरामा प्रधानमन्त्री शेरबहादुर देउवाकै अगाडि मौन अवधिविपरीत क्रियाकलाप गरिएको छ । डडेल्धुराबाट प्रतिनिधिसभा सदस्य उम्मेदवारसमेत रहेका कांग्रेस सभापति देउवाले सुरक्षा घेराभित्र सयौंको संख्यामा आफू बसेको डडेल्धुरास्थित रातो गुराँस रिसोर्टमा मतदाता भेटेका हुन् ।

जककि, बिहीबार राति १२ बजेबाट मौन अवधि सुरु भएसँगै निर्वाचनको प्रचारप्रसारमा रोक लगाइएको थियो ।सुरक्षा घेरभित्र पालैपालो मानिसलाई भित्र पठाइएका थियो । पत्रकारलाई भने फोटो नखिच्न भन्दै सुरक्षाकर्मी तथा देउवाका सहयोगीले धम्कीसमेत दिएका थिए ।