फुटपाथमा व्यापार गर्न रोक लगाइएपछि ६० हजार मानिसको रोजीरोटि खोसियो

सिआईएन

७, आश्विन २०७९

फुटपाथमा व्यापार गर्न रोक लगाइएपछि ६० हजार मानिसको रोजीरोटि खोसियो

अविनाश आचार्य, काठमाडौँ । काठमाडौँ महानगरपालिकाले सडक व्यापारलाई व्यवस्थित बनाउन खोज्दा ६० हजारभन्दा बढी सर्वसाधारणको रोजीरोटी खोसिएको छ । ठूलो लगानी गरि व्यवसाय गर्न नसक्नेहरूले सडक किनारामा व्यापार गर्दै आएका थिए । तर दसैका सामान बेचेर चाडपर्व मनाउने योजना बनाइरहेका उनीहरूलाई चाडवाडकै मुखमा काठमाडौँ महानगरपालिकाले गरेको निर्णयले बज्रपात परेको छ ।

दसैमा बेच्ने योजनाले किनेका सामान कोठामै थन्किएको भन्दै कालिकोटका माया महतराले गुनासो गर्नुभयो । बढ्दो भीडभाड व्यवस्थापन र सहरी सौन्दर्यकरणका लागि महानगरको निर्णय स्वागतयोग्य भए पनि सडकमै व्यापार गरेर पालिएकाहरूको जीवनयापनको उचित टुङ्गो लगाउनुपर्ने फुटपाथ व्यवसायीहरू बताउँछन् ।

काठमाडौँ महानगरपालिकाले फुटपाथमा व्यापार गर्न रोक लगाए पनि यसलाई व्यवस्थापन गर्नेबारे केही बोलेको छैन । महानगरपालिकाका प्रवक्ता नबिन मानन्धरले यस विषयमा सल्लाह भइरहे पनि उचित विकल्पबारे कुनै निर्णय नभएको जानकारी दिनुभयो । अहिले सडक पेटीमा बसेर कतिले व्यापार गरिरहेका छन् भन्ने तथ्याङक नभए पनि करिब ६० हजार मानिस सडकसँगको व्यापारमा निर्भर छन् । उनीहरूको लागि विकल्प खोजिदिनुपर्ने सरोकारवाला बताउँछन् ।