सुदूरपश्चिम प्रदेशमा मनाइने ओल्के पर्व प्रति युवा पुस्ताको चासो घट्दै

इच्छाकामना न्युज

२, भाद्र २०७९

सुदूरपश्चिम प्रदेशमा मनाइने ओल्के पर्व प्रति युवा पुस्ताको चासो घट्दै

भावना पौडेल, डडेलधुरा । सुदूरपश्चिम प्रदेशमा हर्षोल्लासका साथ मनाइने ओल्के पर्व प्रति नयाँ पुस्ताको चासो कम हुँदै गएको छ । सुदूरपश्चिममा प्रत्यक वर्षको भदौ १ गते मनाइने ओल्के पर्वको अवसरमा आफुभन्दा ठूलाबडा, मान्यजन वा ज्येष्ठ नागरिकलाई सम्मान स्वरुप कर्कलाको भित्री पात, फलफूल अनि कोशेलीहरू दिने, मीठो मसिनो खाने, आफन्त भेटघाट गरिन्छ ।

बिसुँ खानु मरुँलो भनि, ओल्के खानु बाँचुलो भनी, भन्ने मान्यताका साथ यो पर्व मनाईन्छ । हरेक वर्ष यो पर्व परेको दिन आफ्ना मान्यजन छरछिमेकीलाई सगुनका रुपमा पिँडालुको कलिलो पात, चिउरीको पात, दूध, दही, मीठाइ, फलफूल तथा कोशेलीहरू दिने गरिएको छ ।

ओल्के पर्वमा विवाहित छोरीलाई माइती घरमा आमन्त्रण गरी सेल, पुरी, माणा, निसोसे, डुब्का खिर लगायत सुदूरपश्चिमका खानाका परिकार खाने खुवाउने प्रचलन छ । केही दशक अघिसम्म यो पर्वको रौनक गाउँघरमा अलग्गै हुन्थ्यो । तर, हिजोआज पर्व मनाउने र यसलाई महत्व दिनेहरू भने घट्दै गएका छन् ।

यो पर्व प्रति युवा पुस्ताको आकर्षण नहुँदा लोप हुन सक्ने भन्दै सरोकारवाला निकाय चिन्तित बनेका छन् । ओल्के पर्वलाई गर्मीयामको प्रकोप र महामारीबाट बचेर नवजीवनको प्राप्ति भएको खुशियालीमा पनि मनाउने गरिएको जनविश्वास छ ।