चुरे क्षेत्रको संरक्षणका लागि १२ वर्षमा १० अर्ब खर्च

इच्छाकामना न्युज

३, आषाढ २०७९

चुरे क्षेत्रको संरक्षणका लागि १२ वर्षमा १० अर्ब खर्च

उषा तामाङ, काठमाडौं, ३ असार । चुरे क्षेत्रको संरक्षणका लागि अभियान सुरु गरेको १२ वर्ष भए पनि प्रभावकारी काम हुन सकेको छैन । अव्यवस्थित बसोबास, वन अतिक्रमण, वन डढेलो, खुला चरिचरण र नदीजन्य पदार्थको दोहन, भू–क्षय लगायतका कारण चुरे क्षेत्र संवेदनशील बन्दै गएको छ । यसका कारण दैनिक जीवनमा प्रत्यक्ष प्रभाव परिरहेको सर्वसाधारणहरू बताउँछन् ।

चुरे संरक्षणका लागि हालसम्म १० अर्ब रुपैयाँ खर्च भए पनि चुरे क्षेत्रको संरक्षण र त्यस क्षेत्रमा बसोबास गर्ने नागरिकको जीवनस्तरबारे कुनै प्रगति नभएको उदयपुरका कुशलबाबू बस्नेतले गुनासो गर्नुभयो । नेपालको ३७ जिल्लामा फैलिएको चुरे क्षेत्रको संरक्षणका लागि आठ वर्ष अघि गठन भएको राष्ट्रपति चुरे–तराई मधेश संरक्षण विकास समितिले काम गरिरहेको छ ।

तराई मधेस संरक्षण तथा व्यवस्थापन गुरुयोजना २०७४ मा २० वर्षका लागि चुरे क्षेत्रको सर्वाङ्गीण विकासका लागि अढाई खर्ब रुपैयाँ लाग्ने अनुमान गरिएको थियो । तर पर्याप्त बजेट विनियोजन नहुँदा चुरे संरक्षणको काम प्रभावकारी नभएको चुरे–तराई मधेश संरक्षण विकास समितिका अध्यक्ष अध्यक्ष डा.किरण पौडेलले बताउनुभयो । चुरे क्षेत्रमा आगामी पाँच वर्षमा कम्तिमा २ करोड रुख र फलफूलका विरुवा रोप्ने समितिको लक्ष्य छ ।