कोरोना नियन्त्रण सम्बन्धि प्रशासनको निर्देशन इच्छाकामना गाउँपालिकाद्वारा अवज्ञा

इच्छाकामना न्युज

११, माघ २०७८

कोरोना नियन्त्रण सम्बन्धि प्रशासनको निर्देशन इच्छाकामना गाउँपालिकाद्वारा अवज्ञा

कुरिनटार,११ माघ । कोभिड–१९ नियन्त्रणका लागि जिल्ला प्रशासन कार्यालय चितवनले जारी गरेको आदेश चितवनको इच्छाकामना गाउँपालिकाका जनप्रतिनिधिहरुले अवज्ञा गरेका छन् । जिल्लामा कोभिडको संक्रमण बढ्दै गएको भन्दै जिल्ला प्रशासन कार्यालय चितवनले माघ ३ गते आदेश जारी गरेको थियो ।

आदेशमा २५ जना भन्दा बढी भेला हुने गरि सबै प्रकारका भेला, सभा,सम्मेलन, प्रदर्शन जात्र, मेला,महोत्सव नगर्न भनिएको छ । २५ जनाको भौतिक उपस्थितिमा कार्यक्रम गर्न परे दुबै मात्रा खोप लगाएको कार्ड भएका र एन्टिजेन नेगेटिभ रहेकाहरुलाई मात्र सहभागी गराउन भनिएको छ । प्रशासनबाट यस्ता आदेश जारी भएपनि स्थानीय जनप्रतिनिधहरुले भने उल्ल्घन गरेका छन् ।

सोमबार चितवनको इच्छाकामना गाउँपालिकाले आदेश विपरित भव्य समारोहकाबिच दशौँ गाउँसभाको उद्घाटन गरेका छन् ।
गाउँपालिकाले तामझामका साथ मानिसहरुको ठूलो संख्यामा भौतिक उपस्थित गराई गाउँसभाको उद्घाटन कार्यक्रम गरेको हो । सभामा उपस्थित हुनेहरुले मास्क लगाएपनि भौतिक दुरी कायम गरेका थिएनन् ।

गाउँपालिकाले पूर्व कर्मचारी,राजनितिक दलका प्रतिनिधि विभिन्न संघसंस्थाका प्रतिनिधि कलाकार संचारकर्मी लगायतलाई निमन्त्रणा समेत गरेका थिए । सो अवसरमा कर्मचारी,पुर्व कर्मचारी,शिक्षक,विभिन्न संघसंस्थाका प्रतिनिधि लगायत संयौँ जनालाई सम्मान गरेका थिए ।

उद्घाटन कार्यक्रममा बोल्ने बक्ताहरुले जिल्ला प्रशासनले जारीको आदेश विपरित जनसहभागिता गराएको प्रति आपत्ति जनाएका थिए ।