आँबुखैरेनीका गुरुङ समाजहरु पहिलो पटक एकै ठाउँमा भेला भई भव्य रुपले तमु ल्होसार मनाए

इच्छाकामना न्युज

१६, पौष २०७८

आँबुखैरेनीका गुरुङ समाजहरु पहिलो पटक एकै ठाउँमा भेला भई भव्य रुपले तमु ल्होसार मनाए

आँबुखैरेनी, १६ पुस । तनहुँको आँबुखैरेनी गाउँपालिका भित्र रहेका गुरुङ समुदायले बिहीबार तमु ल्होसार–२०७८ भव्य रुपले मनाएका छन। आँबुखैरेनी–३, शिवालय मन्दिर र गुम्बाको प्राङ्गणमा वडा १ देखि ६ सम्मका तमु समाज, सबै टोल बस्तिका गुरुङ समुदायहरु एकै ठाउँमा भेला भएर पहिलोपटक तमु ल्होसार पर्व भव्य रुपले मनाएका हुन ।

तमु समुदायको मौलिक पहिरन, कला संस्कृती झल्किने घाटु नाच, मारुनी, चुड्का, झ्याउरे, सेर्गा नाच लगाएत गुरुङ पुरोहितद्वारा कलाकौशल प्रस्तुती सहितको र्‍याली आँबुखैरेनी मिलनचोकबाट सुरु भई कार्यक्रम स्थल शिवालय मन्दिर र गुम्बाको प्राङ्गणमा पुगि सांस्कृतिक कार्यक्रम सुरु भएको थियो । तमु ल्होसार कार्यक्रममा राष्ट्रिय लोक दोहोरी गायक सितल गुरुङ, चन्द्र परियार, बाल गायिका शिखा गुरुङ लगाएत स्थानीय कलाकारहरुले आ–आफ्नो प्रस्तुती दिएका थिए । साथै, गुम्बामा लामा गुरुबाट ग्रह फाल्ने र ग्याप्री गुरुबाट रिपु धागो लगाउने कार्यक्रम भएको थियो ।

तमु ल्होसार मुल समारोह समितिका अध्यक्ष काजी बहादुर गुरुङको अध्यक्षतामा सम्पन्न कार्यक्रममा नेपाली सेनाका भु.पु. कर्णेल अन्त सिंह गुरुङ, आँबुखैरेनी गाउँपालिका अध्यक्ष गिर बहादुर थापा, आँबुखैरेनी गाउँपालिका वडा नं. २,३,४ र ५ का वडाध्यक्ष, नेकपा माओवादीका गंगा कोइराला, नेकपा एमालेकि मिना अधिकारी, नेपाली काङ्ग्रेसका बिष्णु प्रसाद पन्त लगाएतकाको उपस्थिति रहेको तमु ल्होसार मुल समारोह समितिका सह(सचिव पृथ्वी बहादुर गुरुङले जानकारी दिनुभएको छ।