कुरिनटार, २८ जेठ । कोभिड १९ महामारी विरुद्ध लड्नका लागि चितवनको इच्छाकामना गाउँपालिकालाई १५ लाख रूपैयाँ सहयोग प्राप्त भएको छ। गाउँपालिकालाई कोभिड १९ नियन्त्रण तथा रोकथामका लागि  हेफर इन्टरनेशनल नेपाल नामक संस्थाले आज उक्त रकम सहयोग गरेको हो। 

महिला समूह समन्वय समिति, दियालो परिवार र चण्डिभञ्ज्याङ सामाजिक उद्यमी महिला सहकारी संस्थासँगको सहकार्यमा कोभिड १९ आपत्कालीन विश्व माहामारीको रूपमा फैलिएको कोभिड १९ नियन्त्रण तथा रोकथामका लागि गाउँपालिकालाई रकम सहयोग गरिएको चितवन जिल्ला क्लस्टर प्रवन्धक कृष्णबाबु कट्टेलले जानकारी दिनुभएको थियोे ।  

सो आर्थिक सहयोग इच्छाकामना गाउँपालिकाको प्रभावित जनताहरूका लागि संस्थाले उपलब्ध गराएका हुन्।  सो रकम मार्फत गाउँपालिकाले अक्सिजन सिलिन्डर, लिक्विड अक्सिजन, अक्सिजन कन्सट्रेटर, भेन्टिलेटर, आईसीयु, एक्सरे मेशिन, आइसोलेसन तथा कोभिड अस्पताल निर्माण, इन्फ्रारेड थर्मोमिटर, पल्स अक्सिजन, पिपिई किट लगाएतका स्वास्थ्य उपचार र सुरक्षा सामग्रीहरू खरिद गर्नमा खर्च गर्नुपर्ने कट्टेलले जानकारी दिएका थिए । 

हेफरले यस्तो समयमा महामारीलाई मध्यनजर गर्दै पालिकालाई सहयोग गरकोमा इच्छाकामना गाउँपालिकाका अध्यक्ष गीता कुमारी गुरुङले धन्यवाद प्रकट गर्दै यो सहयोगले आम गाउँपालिकावासिलाई धेरै ठुलो सहयोग पुग्ने बताएका थिए।  अध्यक्ष गुरुङले हेफर नेपालले अतुलनीय कार्य गरेको बताउदैँ आगामी दिनहरूमा पनि सहकार्यमा अघि बढ्ने प्रतिबद्धता जनाएका थिए।

कार्यक्रममा महिला समन्वय समितिका अध्यक्ष इन्दिरा आचार्य, दियालो परिवारका अध्यक्ष सुरेश खनाल, चण्डिभञ्ज्याङ सामाजिक उद्यमी महिला सहकारीका अध्यक्ष रश्मी गुरुङ लगायतको उपस्थिति रहेको थियो।