चितवन, फागुन १७। पछिल्लो समय चितवनमा कोरोना भाइरस (कोभिड–१९) संक्रमितको संख्या न्यून अवस्थामा पुगेको छ । स्वास्थ्य कार्यालय चितवनका अनुसार  (आइतबार) साँझ सम्ममा जिल्लामा कुल संक्रमितको संख्या ७३ रहेको छ । यो संख्या निरन्तर ओरालो लाग्ने क्रममा छ । हाल सबैभन्दा धेरै संक्रमित भरतपुर महानगरपालिकाका रहेकाछन् । त्यहाँ कुल संक्रमितको संख्या ६२ रहेको हो । जसमध्ये ५४ जना होम आइसोलेसनमा छन् भने ८ जना अस्पतालको आइसोलेसनमा छन् । यस्तै माडी नगरपालिकामा ४ जना संक्रमित छन् । उनीहरु सबै होम आइसोलेसनमा रहेकाछन् । खैरहनी नगरपालिकामा ३ जना संक्रमित छन् । उनीहरु पनि होम आइसोलेसनमा छन् । यस्तै राप्ती नगरपालिकामा २, रत्ननगर र कालिका नगरपालिकामा एक÷एक जना संक्रमित छन् । उनीहरु सबै होमआइसोलेसनमै छन् । चितवन जिल्लाको एकमात्र गाउँपालिका इच्छाकामना भने कोरोना संक्रमणमुक्त भएको छ । त्यस गाउँपालिकामा ३९ जना संक्रमणमुक्त भएका छन् । कोरोनाबाट यस गाउँपालिकामा एक जनाले मात्रै ज्यान गुमाएका छन् ।

६ हजार बढी निको भए
एक समय चितवनमा दैनिकजसो एक सयको हाराहारीमा कोरोना संक्रमित भेटिदै आएको थियो । अहिले भने ह्वात्तै घटेको छ । जिल्लामा सबैभन्दा बढी संक्रमित भरतपुर महानगरपालिका भित्र नै भेटिएका छन् । स्वास्थ्य कार्यालयको तथ्यांक अनुसार भरतपुरका ४ हजार ८१४ जना संक्रमित निको भइसकेका छन् । कोरोनाबाटै यहाँ ६८ जनाले ज्यान गुमाए । भरतपुरमा कुल संक्रमितको संख्या ४ हजार ९४४ पुगेको छ । यस्तै रत्ननगर नगरपालिकामा ७७२ जना संक्रमित निको भएका छन् । यहाँका १३ जनाको कोरोना संक्रमणबाट ज्यान गएको हो । यहाँ कुल संक्रमितको संख्या ७८६ पुगेको छ । खैरहनी नगरपालिकामा ४०५, राप्ती नगरपालिकामा ३११, कालिका नगरपालिकामा १८६, माडी नगरपालिकामा १४१ संक्रमित निको भएका छन् । यस्तै इच्छाकामना गाउँपालिकाका ३९ जना संक्रमित निको भएका छन् । एक जना संक्रमितको भने मृत्यु भयो । यससंगै जिल्लाका कुल ६ हजार ६६८ जना संक्रमित निको भएका छन् । कुल संक्रमितको संख्या भने ६ हजार ८५० पुगेको छ ।
४ जना थपिए संक्रमित
चितवनमा आज (आइतबार) ४ जना कोरोना भाइरस संक्रमित थपिएका छन् । स्वास्थ्य कार्यालयका अनुसार भतरपुर महानगरपालिकामा ३ र कालिका नगरपालिकामा एक जना कोरोना संक्रमित थपिएका हुन । यससंगै शून्य अवस्थामा पुगेको कालिकामा फेरि संक्रमित थप भएको हो । कालिकामा हालसम्म संक्रमितको संख्या १९५ पुगेको छ ।