वैदेशिक रोजगार

श्रम गन्तव्य देशहरू थप्ने तयारीमा सरकार

इच्छाकामना न्युज

८, आषाढ २०७९

सजना तिमल्सिना, काठमाडौँ, ८ असार । सरकारले श्रम गन्तव्यको देशहरू थप्न लागेको जनाएको छ । विश्वका एक सय १० ओटा देशमा श्रम स्वीकृति लिएर जानसक्ने व्यवस्था गरिए पनि युएइ, कतार, मलेसिया, कोरिया, बहराइन, जोर्डन, इजरायल लगायतका नौ ओटा देशलाई भने श्रम गन्तव्यको रुपमा तोकेको छ । यस बाहेकका देशमा पनि रोजगारीका लागि जाने र अलपत्र पर्ने नेपालीको सङ्ख्या बढ्दै गएपछि सरकारले श्रम गन्तव्यको देशहरू थप्न लागेको हो ।

श्रम, रोजगार तथा सामाजिक सुरक्षा मन्त्रालयलका सहसचिव राजिव पोखरेलले साउदी अरेबिया, सेसेल्स, बेलायत लगायतका देशमा श्रम सम्झौता गर्ने तयारी भइरहेको बताउनुभयो । वैदेशिक रोजगार विभागका अनुसार गत जेठ महिनामा मात्रै ५६ हजार ५ सय ७७ जना पुरुष र ५ हजार ७ सय ७२ जना महिलागरि ६२ हजार जनाले विभिन्न मुलुकमा जान श्रम स्वीकृति लिएका छन् । सरकार र विज्ञहरूले पनि श्रम सम्झौता नभएको मुलुकमा नजान आग्रह गर्दै आएका छन् ।

सरकारले तोके बाहेकका देशमा जानकै लागि समस्या हुने, पुगेपछि काम नपाइने, काम पाएपनि श्रम शोषण हुने जस्ता समस्या हुने, एक जना जानकार जीवराम भण्डारीले बताउनुभयो । खाडी मुलुक र मलेसियामा नेपालबाट वार्षिक एक लाखका दरले गइरहेको भए पनि युरोप र अन्य एसियाका देशमा भने हजारका दरले मात्रै श्रमिकहरू गइरहेका सरकारी तथ्याङ्कले देखाएको छ । श्रम स्वीकृति र श्रम सम्झौता नै नभएका देशमा समेत नेपालीहरू रोजगारीका लागि जान थालेपछि सरकारले श्रम गन्तव्य मुलुक बढाउने गृहकार्य गरिरहेको हो ।